Hindistonda kelin o‘z to‘yida havoga o‘q uzib, qochib ketdi (video)

Hindiston shimolidagi Uttar-Pradesh shtati politsiyasi o‘z to‘yida quroldan o‘q uzgan kelinni qidirmoqda. Bu haqda BBC xabar berdi.

Ijtimoiy tarmoqlarda e’lon qilingan videoda turmush o‘rtog‘i yonida o‘tirgan kelinchak o‘qotar quroldan havoga to‘rt marta o‘q uzganini ko‘rish mumkin. Mahalliy politsiya voqeadan so‘ng bedarak yo‘qolgan kelinga nisbatan ish ochgan.

Hindistonning ba’zi shimoliy shtatlarida to‘y paytida to‘pponchadan o‘q uzish keng tarqalgan va ko‘pincha jarohatlar, hatto baxtsiz hodisalarga ham olib keladi. Mamlakat qonunlariga ko‘ra, o‘qotar quroldan “beparvolik, ehtiyotsizlik yoki bayram tadbirida” foydalanib, boshqalarni xavf ostiga qo‘ygan har bir kishi qamoq, jarima yoki ikkalasiga ham hukm qilinishi mumkin.

Kelinning videosini ijtimoiy tarmoqlarga qarindoshlari joylagan. Politsiya ayol hibsga olinishidan qo‘rqib yashiringanini ma’lum qildi.

2016-yilda Uttar-Pradesh poytaxti Lakxnau sudi to‘ylarda o‘qotar qurol qo‘llash bilan bog‘liq har bir holat, politsiyaga shikoyat qilingan-qilmaganidan qat’i nazar, tekshirilishi kerak, degan qarorga kelgan.