Ukraina Xavfsizlik ximati Ukraina fuqarolari tomonidan Rossiya huquq-tartibot idoralari — Milliy gvardiya va Ichki ishlar vazirligining yashirincha moliyalashtirilishiga oid sxemani yo‘q qilgani haqida e’lon qildi.
Razvedka xizmati maʼlumotlariga koʻra, sxemani tashkillashtirishda Ukrainada davlatga xiyonatda ayblanayotgan Viktor Medvedchukning rafiqasi Oksana Marchenko ishtirok etgan. U “go‘yoki Medvedchukning Qrimdagi ko‘chmas mulkini himoya qilish uchun” Rossiya gvardiyasi va Ichki ishlar vazirligining anneksiya qilingan yarimoroldagi hisob raqamlariga millionlab dollar o‘tkazgan Kiyev kompaniyalari tarmog‘i va Yaltadagi korxonaning yakuniy foyda oluvchisi deb atalmoqda.
Shuningdek, Marchenkoning biznes tuzilmasi “soliq va yig‘imlar” to‘lash shaklida Rossiya budjetini muntazam ravishda to‘ldirib turgani aytiladi. Rossiyaga to‘lovlarning umumiy miqdori 50 million grivnadan ko‘proqqa (1,354 million dollar) baholanmoqda.
UXX ta’kidlashicha, ushbu sxemani amalga oshirish uchun Oksana Marchenko Yaltada ustav kapitali bir milliard rubldan ortiq bo‘lgan kompaniyani Kiyevdagi uchta investitsiya kompaniyasining aktivlaridan foydalangan holda ro‘yxatdan o‘tkazgan.
UXX Oksana Marchenko va uning Qrimdagi kompaniyasi rahbari Ukraina Jinoyat kodeksining 110-2-moddasida nazarda tutilgan jinoyatlarda (davlat hokimiyatini majburan almashtirish yoki egallab olish, Ukrainaning davlat chegaralarini o‘zgartirish maqsadida sodir etilgan harakatlarni moliyalashtirish) gumonlanayotganini ma’lum qildi. Gumonlanuvchilar mol-mulki musodara qilinib, sakkiz yilgacha ozodlikdan mahrum etilishi mumkin.
Meduza xabariga ko‘ra, Viktor Medvedchukning rafiqasi Oksana Marchenko va ularning 19 yoshli qizi Darya hozir Moskvada yashaydi.
Ma’lumot o‘rnida, “Putinning qadrdoni” deb ataladigan Viktor Medvedchukka 2021-yilda Ukraina huquq-tartibot idoralari davlatga xiyonat va “milliy boyliklarni talon-taroj qilishga urinish” bo‘yicha ikkita ayblov qo‘ydi. Medvedchuk uy qamog‘iga olingan, xabarlarga ko‘ra, u Rossiya Ukrainaga bostirib kirgan dastlabki kunlarda qochib ketgan. 12-aprel kuni Ukraina rasmiylari Medvedchuk hibsga olingani haqida ma’lum qildi.
21-sentabr kuni asirlar bilan ayirboshlashuv doirasida Kiyev Moskvaga siyosatchi Viktor Medvedchukni va 55 nafar rossiyalik harbiylarni topshirgandi.
Izoh (0)