Ukraina prezidenti Vladimir Zelenskiy Oliy rada deputati va “Muxolifat platformasi — Hayot uchun” rossiyaparast partiyasi siyosiy kengashi sobiq rahbari Viktor Medvedchukni Ukraina fuqaroligidan mahrum qildi. Bu haqda Zelenskiy o‘zining kechki murojaatida ma’lum qildi.
Bundan tashqari, yana uch nafar deputat — “Muxolifat platformasi — Hayot uchun” partiyasidan Oliy radaga saylangan Taras Kozak va Renat Kuzmin hamda Radaning fraksiyadan tashqari deputati Andrey Derkach ham Ukraina fuqaroligidan chiqarildi.
Zelenskiy bu odamlarni “Ukraina Xavfsizlik xizmati va Davlat migratsiya xizmati tomonidan tayyorlangan materiallar asosida” fuqarolikdan mahrum qilganini aytdi.
“Agar xalq tomonidan saylanganlar Ukraina xalqiga emas, Ukrainaga kelgan qotillarga xizmat qilishni tanlasa, bizning xatti-harakatlarimiz ham shunga yarasha bo‘ladi”, — dedi Zelenskiy va bu “shunday qarorlarning so‘nggisi emasligi”ni qo‘shib qo‘ydi.
“Muxolifat platformasi – hayot uchun” partiyasi rahbari Viktor Medvedchuk rossiyaparast siyosatchi sifatida tanilgan. OAV uni “Vladimir Putinning qadrdoni” deb ataydi.
2021-yilda Ukraina huquq-tartibot idoralari Medvedchukka davlatga xiyonat va “milliy boyliklarni talon-taroj qilishga urinish” bo‘yicha ikkita ayblov qo‘ydi. Medvedchuk uy qamog‘iga olingan, xabarlarga ko‘ra, u Rossiya Ukrainaga bostirib kirgan dastlabki kunlarda qochib ketgan. 12-aprel kuni Ukraina rasmiylari Medvedchuk hibsga olingani haqida ma’lum qildi.
21-sentabr kuni asirlar bilan ayirboshlashuv doirasida Kiyev Moskvaga siyosatchi Viktor Medvedchukni va 55 nafar rossiyalik harbiylarni topshirgandi.
Medvedchuk 215 nafar ukrain harbiylari, shu jumladan, Mariupoldagi “Azovstal” zavodi himoyachilari va “Azov” polki qo‘mondonligiga almashtirilgan. Shuningdek, Ukraina tomonida jang qilib, asirlikka tushgan o‘n nafar chet ellik ham qaytarilgan.
Mavzuga doir:
Izoh (0)