NATO bosh kotibi o‘rinbosari Mircha Joane Shimoliy Atlantika alyansi Rossiyaning Moldovaga ehtimoliy hujumi xavfini ko‘rmayotganini, biroq mamlakatdagi vaziyatni beqarorlashtirishga urinishlarni kuzatayotganini aytdi. Bu haqda alyans vakili TVR Info telekanaliga bergan intervyusida gapirdi.
“Men aytganman va takror aytamanki, biz Rossiya tomonidan Moldova respublikasiga harbiy hujum xavfi yaqinlashib kelayotganini ko‘rmayapmiz”, — dedi u va alyans Moldovaning betarafligini saqlashda davom etgan holda unga harbiy yordamni kuchaytirishini qo‘shimcha qildi.
27-mart kuni Moldovada NATO davlatlari bilan birgalikda maxsus kuchlar bo‘linmalarining harbiy mashg‘ulotlari boshlandi. Moldova, Ruminiya, Amerika va Britaniya maxsus kuchlari harbiy xizmatchilari o‘rtasida tajriba almashishga qaratilgan o‘quv mashg‘ulotlari 7-aprelga qadar davom etadi.
Moldovaga Rossiya hujumi haqida xavotirlar bor
Ukraina prezidenti Vladimir Zelenskiy Bryusselda bo‘lib o‘tgan Yevropa Ittifoqi sammitida Rossiya Moldovani bosib olishni rejalashtirayotganini aytgandi. Zelenskiy razvedka qo‘lga kiritgan Rossiyaning bosib olish rejasi haqida Moldova prezidenti Mayya Sanduni ogohlantirganini ta’kidlagan.
Shundan so‘ng Mayya Sandu Moldova prezidenti Rossiyaning mamlakatda davlat to‘ntarishini amalga oshirish rejalari haqida gapirgan. U Rossiya Belarus, Serbiya va Chernogoriya fuqarolarini jalb qilgan holda Moldovadagi hukumat binolariga hujum qilishni va hokimiyatni o‘zgartirishni rejalashtirayotganini aytgan. Ayni vaqtda Moldova bosh vaziri Dorin Rechan Rossiyaning Moldovaga bostirib kirishi ehtimoldan yiroq ekani, chunki u ikki frontda kurasha olmasligi, qolaversa, buning uchun resurslari yetmasligini ta’kidladi.
Bungacha Moldova razvedkasi rahbari Rossiya 2023-yil boshida mamlakatga qarshi urush boshlashni rejalashtirgani, ammo ssenariyni amalga oshirish Ukrainadagi vaziyatning rivojlanishiga bog‘liqligini ma’lum qilgandi. Rossiya tashqi ishlar vaziri Sergey Lavrov G‘arb davlatlari Moldovani “navbatdagi Ukraina” sifatida ko‘rayotganini aytgandi.
Izoh (0)