Amerika Urushni o‘rganish instituti (ISW) hisobotida aytilishicha, Rossiya kuchlari so‘nggi haftada Baxmut hududining yana besh foizini egallab oldi va hozirda shahar hududining qariyb 65 foizini nazorat qilmoqda.
ISW geojoylashuv ko‘rsatilgan videolarga tayanib, janubdan “Vagner” yollanma jangchilari bo‘linmalari shahar markazigacha, bozor va shahar kengashi binosi yonida joylashgan Madaniyat saroyigacha siljiganini yozmoqda.
Shaharning shimoli-g‘arbiy qismida “Vagner” rangli metallni qayta ishlash zavodi “AZOM” hududini to‘liq egallab olgan va sanoat zonasining janubiga qarab harakatlangan.
Baxmut maydoni 40 kvadrat kilometrdan biroz ko‘proq, shuning uchun shahar hududining 5 foizi taxminan ikki kvadrat kilometrni tashkil qiladi.
Ukraina Qurolli kuchlarining sharqiy guruhi spikeri Sergey Cherevatiy Baxmutda Rossiya va Ukraina kuchlari o‘rtasida jangovar to‘qnashuvlar soni kamayganini ma’lum qilgandi.
“Oxirgi uch kun ichida janglar soni kamaydi, ammo Baxmutdagi vaziyatni jiddiy tahlil qilish kerak, bunga qo‘shinlarning ma’lum bir qayta guruhlanishi sabab bo‘lgan bo‘lishi mumkin. O‘ylaymanki, keyingi kunlar yoki bir hafta ichida bunga nima sabab bo‘lganini bilishimiz mumkin”, — dedi Cherevatiy.
Baxmut yo‘nalishida Rossiyaning asosiy zarba beruvchi kuchi “Vagner”ning askarlari bo‘lib qolmoqda, ammo ular muntazam qo‘shinlar bilan mustahkamlangan.
Izoh (0)