НАТО бош котиби ўринбосари Мирча Жоане Шимолий Атлантика алянси Россиянинг Молдовага эҳтимолий ҳужуми хавфини кўрмаётганини, бироқ мамлакатдаги вазиятни беқарорлаштиришга уринишларни кузатаётганини айтди. Бу ҳақда алянс вакили TVR Info телеканалига берган интервьюсида гапирди.
“Мен айтганман ва такрор айтаманки, биз Россия томонидан Молдова республикасига ҳарбий ҳужум хавфи яқинлашиб келаётганини кўрмаяпмиз”, — деди у ва алянс Молдованинг бетарафлигини сақлашда давом этган ҳолда унга ҳарбий ёрдамни кучайтиришини қўшимча қилди.
27 март куни Молдовада НАТО давлатлари билан биргаликда махсус кучлар бўлинмаларининг ҳарбий машғулотлари бошланди. Молдова, Руминия, Америка ва Британия махсус кучлари ҳарбий хизматчилари ўртасида тажриба алмашишга қаратилган ўқув машғулотлари 7 апрелга қадар давом этади.
Молдовага Россия ҳужуми ҳақида хавотирлар бор
Украина президенти Владимир Зеленский Брюсселда бўлиб ўтган Европа Иттифоқи саммитида Россия Молдовани босиб олишни режалаштираётганини айтганди. Зеленский разведка қўлга киритган Россиянинг босиб олиш режаси ҳақида Молдова президенти Майя Сандуни огоҳлантирганини таъкидлаган.
Шундан сўнг Майя Санду Молдова президенти Россиянинг мамлакатда давлат тўнтаришини амалга ошириш режалари ҳақида гапирган. У Россия Беларусь, Сербия ва Черногория фуқароларини жалб қилган ҳолда Молдовадаги ҳукумат биноларига ҳужум қилишни ва ҳокимиятни ўзгартиришни режалаштираётганини айтган. Айни вақтда Молдова бош вазири Дорин Речан Россиянинг Молдовага бостириб кириши эҳтимолдан йироқ экани, чунки у икки фронтда кураша олмаслиги, қолаверса, бунинг учун ресурслари етмаслигини таъкидлади.
Бунгача Молдова разведкаси раҳбари Россия 2023 йил бошида мамлакатга қарши уруш бошлашни режалаштиргани, аммо сценарийни амалга ошириш Украинадаги вазиятнинг ривожланишига боғлиқлигини маълум қилганди. Россия ташқи ишлар вазири Сергей Лавров Ғарб давлатлари Молдовани “навбатдаги Украина” сифатида кўраётганини айтганди.
Изоҳ (0)