AQSH prezidenti Jo Bayden Rossiya prezidenti Vladimir Putinning Belarusda yadro qurolini joylashtirish niyati haqidagi bayonotiga izoh berdi. Bayden jurnalistlarga Rossiyaning qo‘shni davlatda yadro qurolini joylashtirish rejalaridan xavotirda ekanini aytdi, deb yozmoqda CNN. Shu bilan birga, u Rossiya hali bunday qadamni tashlamaganini ta’kidladi.
“Ular hali buni amalga oshirmadi, agar men vertolyotda bo‘lganimda biror nima yuz bermagan bo‘lsa. Albatta, bu meni tashvishga solmoqda. O‘tgan bir yil davomida sizlar bilan nima haqda gaplashdim? Bu xavfli suhbat, bu xavotir keltirib chiqaradi”, — qo‘shimcha qildi AQSH prezident.
Belarusda yadro qurolining joylashtirilishi: hozirgacha nimalar ma’lum?
25-mart kuni Putin Belarusda taktik yadro qurollarini saqlash uchun maxsus ombor qurilayotganini ma’lum qildi. Bunga javoban Ukraina Birlashgan Millatlar Tashkiloti Xavfsizlik kengashining navbatdan tashqari yig‘ilishini chaqirishni talab qildi. Yig‘ilish shu hafta bo‘lib o‘tadi.
AQSH Rossiya hukumatining e’lonidan keyin Amerika yadroviy kuchlarining tayyorgarligini o‘zgartirish uchun hech qanday sabab ko‘rmayotganini qayd etdi. Yevropa Ittifoqi Belarusni bu ishni to‘xtatishga chaqirdi va aks holda unga qarshi sanksiyalar qo‘llanishini bildirdi. Litva ham Rossiya va Belarusga qarshi sanksiyalar joriy etish niyatida.
Polsha Putin va Lukashenkoning qarorini Belarusni Rossiya harbiy mashinasiga tortish yo‘lidagi qadam deb atadi, Germaniya esa Rossiyaning bayonotini “yadroviy qo‘rqitishga navbatdagi urinish” deb atadi. Fransiya Rossiyaning qarorini qoralab, ushbu rejani qayta ko‘rib chiqishga chaqirdi. Xitoy ham Rossiya rejasiga qarshi chiqdi.
28-mart kuni respublikachi senator Jim Rish Baydenni ushbu tahdidlarga javoban Ukrainaga uzoq masofali va kassetali o‘q-dorilar yetkazib berishga chaqirdi.
Izoh (0)