Moldova bosh vaziri Dorin Rechan Rossiyaning Moldovaga bostirib kirishi ehtimoldan yiroq ekani, chunki u ikki frontda kurasha olmasligi, qolaversa, buning uchun resurslari yetmasligini ta’kidladi.
Rechanning aytishicha, Rossiya Moldovaga hujum qila olmaydi, chunki ularning orasi juda uzoq, mamlakatlarni Ukraina ajratib turadi.
“Rossiya eskalatsiya uchun yetarli resurslarga ega emas. Bundan tashqari, Rossiya Federatsiyasi Moldovaga harbiy yo‘l bilan bora olmasligi ham aniq. Boshqa tomondan, Moldova Dnestrbo‘yida yuzaga kelishi mumkin bo‘lgan eskalatsiyaning oldini olish uchun yetarli salohiyatga ega. Dnestrbo‘yi mintaqasi esa biz kabi tinchlik va barqarorlikka intiladi”, — dedi Moldova bosh vaziri.
Rechanning ta’kidlashicha, Rossiya gibrid va axborot urushi olib bormoqda, propoganda, dezinformatsiya va urushni yoqlovchi ba’zi to‘qima g‘oyalarni targ‘ib qilmoqda. Shu bilan birga, siyosatchi Kreml muvaffaqiyatga erisha olmasligiga ishonchi komil ekanini ta’kidladi.
Moldova bosh vaziri mamlakat asosan Ukrainaning havo hujumidan mudofaa tizimlari bilan himoyalanganini eslatdi.
Avvalroq Ukraina prezidenti Vladimir Zelenskiy Bryusselda bo‘lib o‘tgan Yevropa Ittifoqi sammitida Rossiya Moldovani bosib olishni rejalashtirayotganini aytgandi. Zelenskiy razvedka qo‘lga kiritgan Rossiyaning bosib olish rejasi haqida Moldova prezidenti Mayya Sanduni ogohlantirganini ta’kidlagan.
Shundan so‘ng Mayya Sandu Moldova prezidenti Rossiyaning mamlakatda davlat to‘ntarishini amalga oshirish rejalari haqida gapirgan. U Rossiya Belarus, Serbiya va Chernogoriya fuqarolarini jalb qilgan holda Moldovadagi hukumat binolariga hujum qilishni va hokimiyatni o‘zgartirishni rejalashtirayotganini aytgan.
Bungacha Moldova razvedkasi rahbari Rossiya 2023-yil boshida mamlakatga qarshi urush boshlashni rejalashtirgani, ammo ssenariyni amalga oshirish Ukrainadagi vaziyatning rivojlanishiga bog‘liqligini ma’lum qilgandi. Rossiya tashqi ishlar vaziri Sergey Lavrov G‘arb davlatlari Moldovani “navbatdagi Ukraina” sifatida ko‘rayotganini aytgandi.
Izoh (0)