Ukraina prezidenti Vladimir Zelenskiy nega Ukraina Qurolli kuchlari uchun Donetsk viloyatidagi Baxmut shahrini saqlab qolish muhimligini aytdi. Bu haqda u Associated Press agentligiga bergan intervyusida ma’lum qildi.
Zelenskiyga ko‘ra, birinchi navbatda, Donbassdagi aholi punktini siyosiy ma’noda saqlab qolish kerak, chunki shaharni qo‘lga kiritish Rossiya prezidenti Vladimir Putin uchun foydali bo‘ladi. U o‘z “g‘alabasini” Ukrainaning G‘arbdagi ittifoqchilari, Rossiya jamoatchiligi, Xitoy va Eronga “sotishga” harakat qilardi.
Natijada G‘arb hamkorlari Rossiya bilan tinchlik muzokaralarini boshlash vaqti keldi, degan tezisni faol ravishda ilgari surishi mumkin, bu ham himoyachilarning, ham fuqarolarning ruhiyatiga putur yetkazadi. Biz chekina olmaymiz, chunki urush bu pirog, g‘alaba esa uning parchalari. Kichik g‘alabalar, kichik qadamlardir. Agar Rossiya qonni his qilsa, zaif ekanligimizni his qilsa, bosim o‘tkazadi. Jamiyatimiz charchaganini his qiladi. Shundan so‘ng Ukraina aholisi meni ular bilan murosa qilishga undaydi, — deydi Zelenskiy.
Baxmut uchun janglar yetti oydan ko‘proq vaqtdan beri davom etmoqda. Zelenskiy hozircha mamlakat ichida ham, tashqarisida ham bosimni sezmayotganini ta’kidladi.
“Bunday qo‘llab-quvvatlash mamlakat ma’naviyatini yuksaltiradi, chunki bizda kurashadigan narsa bor”, — dedi Ukraina rahbari.
Amerika Urushni o‘rganish instituti (ISW) hisobotida Rossiya kuchlari so‘nggi haftada Baxmut hududining yana besh foizini egallab olgani va hozirda shahar hududining qariyb 65 foizini nazorat qilayotganini keltirdi.
ISW geojoylashuv ko‘rsatilgan videolarga tayanib, janubdan “Vagner” yollanma jangchilari bo‘linmalari shahar markazigacha, bozor va shahar kengashi binosi yonida joylashgan Madaniyat saroyigacha siljiganini yozmoqda.
O‘z navbatida, Ukraina Qurolli kuchlarining sharqiy guruhi spikeri Sergey Cherevatiy Baxmutda Rossiya va Ukraina kuchlari o‘rtasida jangovar to‘qnashuvlar soni kamayganini ma’lum qilgan. Baxmut yo‘nalishida Rossiyaning asosiy zarba beruvchi kuchi “Vagner”ning askarlari bo‘lib qolmoqda, ammo ular muntazam qo‘shinlar bilan mustahkamlangan.
Izoh (0)