Qoraqalpog‘istonda bir necha litr aroqni Rossiyadan mamlakat hududiga noodatiy usulda olib kirmoqchi bo‘lganlar ushlandi. Bu haqda Bojxona qo‘mitasi axborot xizmati xabar berdi.
Xabarga ko‘ra, Qoraqalpog‘iston bojxona boshqarmasi xodimlari tomonidan To‘rtko‘l tumanida tezkor tadbir o‘tkazildi. Tadbirda mamlakat hududidan tranzit tarzida harakatlanayotgan Xo‘jand-Volgograd yo‘nalishidagi poyezd yo‘lovchilaridan biri yonidagi 48 dona plastik idishda, jami 72 litr aroqni vagondan tashqariga uloqtirib yuborgani fosh qilindi.
Keltirilishicha, aroq Volgogradga yetib borish uchun mo‘ljallanmagan, aksincha mo‘may daromad evaziga O‘zbekiston hududida tushirib qoldirilishi va sheriklari tushirib qoldirilgan joydan aroqlarni olib ketishi ko‘zlangan.
Shuningdek, tezkor kuzatuvga olingan ushbu yo‘lovchi poyezdi “Raushan” va “Kunxo‘ja” temiryo‘l bekatlari oralig‘ida kimsasiz cho‘l bo‘ylab harakatlanayotganda poyezd kuzatuvchilari tomonidan kutilmaganda favqulodda to‘xtash tugmasi orqali to‘satdan to‘xtatiladi.
Qayd etilishicha, aslida hech qanday favulodda holat sodir bo‘lmagan. Atrofda hech kim yo‘qligiga ishonch hosil qilgan vagon kuzatuvchilaridan biri 150 dona plastmass idishdagi 225 litr hajmdagi aroqlarni respublika hududiga tushirib qoldirish uchun poyezdni ataylab to‘xtatgan. Ushbu shaxs aroqlarni vagondan tushirayotganda tezkor xodimlar tomonidan qo‘lga olindi.
“Qoraqalpog‘iston” temiryo‘l chegara bojxona postida aniqlangan holatda esa yo‘lovchilardan biri yo‘lovchi bojxona deklaratsiyasida va bojxona xodimlarining og‘zaki so‘rovida maʼlum qilinmagan har biri 1 litrlik 40 shisha viskini o‘rindiq ostiga, shuningdek, ko‘rpa va yostiq jildlari ichiga yashirgani aniqlandi.
Hozirda yuqoridagi holatlar yuzasidan bojxona organlari tomonidan tergovga qadar tekshiruv harakatlari davom ettirilmoqda.
Izoh (0)