Samarqand shahrida Meksika orqali AQSHga yuborishini aytib, fuqarodan 50 ming dollar so‘ragan shaxs ushlandi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, holat DXX Samarqand viloyati boshqarmasi hamda viloyat IIB xodimlari hamkorligida o‘tkazilgan tezkor tadbirlardan birida aniqlangan. 1996-yilda tug‘ilgan J.Y. mahalliy fuqaroni 50 000 dollar evaziga Toshkent-YI-Meksika-AQSH yo‘nalishi orqali AQSHga jo‘natishni vaʼda qilib, zaruriy hujjatlarni rasmiylashtirish uchun fuqaro N.T.dan “avans” sifatida 10.000 AQSH dollarini olayotgan vaqtida ashyoviy dalillar bilan qo‘lga olindi.
Fuqaro J.Y.ga tegishli avtomashina ko‘zdan kechirilganida esa fuqaro N.T.ga tegishli xorijga chiqish pasporti, uning qiziga tegishli ID-karta, tug‘ilganlik haqidagi guvohnoma va hokazolar borligi aniqlanib, ashyoviy dalillarning barchasi tegishli tartibda rasmiylashtirib olindi.
Hozirda holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Izoh (0)