Қорақалпоғистонда алкогол маҳсулотларини Россиядан мамлакат ҳудудига ноодатий усулда олиб кирмоқчи бўлганлар ушланди 

Қорақалпоғистонда бир неча литр ароқни Россиядан мамлакат ҳудудига ноодатий усулда олиб кирмоқчи бўлганлар ушланди. Бу ҳақда Божхона қўмитаси ахборот хизмати хабар берди. 

Хабарга кўра, Қорақалпоғистон божхона бошқармаси ходимлари томонидан Тўрткўл туманида тезкор тадбир ўтказилди. Тадбирда мамлакат ҳудудидан транзит тарзида ҳаракатланаётган Хўжанд-Волгоград йўналишидаги поезд йўловчиларидан бири ёнидаги 48 дона пластик идишда, жами 72 литр ароқни вагондан ташқарига улоқтириб юборгани фош қилинди.

Келтирилишича, ароқ Волгоградга етиб бориш учун мўлжалланмаган, аксинча мўмай даромад эвазига Ўзбекистон ҳудудида тушириб қолдирилиши ва шериклари тушириб қолдирилган жойдан ароқларни олиб кетиши кўзланган. 

Шунингдек, тезкор кузатувга олинган ушбу йўловчи поезди “Раушан” ва “Кунхўжа” темирйўл бекатлари оралиғида кимсасиз чўл бўйлаб ҳаракатланаётганда поезд кузатувчилари томонидан кутилмаганда фавқулодда тўхташ тугмаси орқали тўсатдан тўхтатилади. 

Қайд этилишича, аслида ҳеч қандай фавулодда ҳолат содир бўлмаган. Атрофда ҳеч ким йўқлигига ишонч ҳосил қилган вагон кузатувчиларидан бири 150 дона пластмасс идишдаги 225 литр ҳажмдаги ароқларни республика ҳудудига тушириб қолдириш учун поездни атайлаб тўхтатган. Ушбу шахс ароқларни вагондан тушираётганда тезкор ходимлар томонидан қўлга олинди.

“Қорақалпоғистон” темирйўл чегара божхона постида аниқланган ҳолатда эса йўловчилардан бири йўловчи божхона декларациясида ва божхона ходимларининг оғзаки сўровида маълум қилинмаган ҳар бири 1 литрлик 40 шиша вискини ўриндиқ остига, шунингдек, кўрпа ва ёстиқ жилдлари ичига яширгани аниқланди. 

Ҳозирда юқоридаги ҳолатлар юзасидан божхона органлари томонидан терговга қадар текширув ҳаракатлари давом эттирилмоқда.