Жо Байден яқин орада Си Цзиньпин билан гаплашмоқчилигини маълум қилди

АҚШ президенти Жо Байден яқин орада Хитой раҳбари Си Цзиньпин билан гаплашиш нияти борлигини айтди, деб ёзмоқда Reuters.

АҚШ АUКUS (Австралия, Буюк Британия ва АҚШ қисқартмаси) ҳарбий иттифоқи доирасида Хитойдан ҳимояланиш учун Австралияга учта ядро сувости кемасини сотмоқда. 13 март куни Калифорния штати Сан-Диэго шаҳридаги Point Loma ҳарбий-денгиз базасида уч давлат етакчилари учрашув ўтказди.

Пекин Австралия, Буюк Британия ва Қўшма Штатлар ўртасидаги ҳарбий иттифоқ режаларини агрессия деб баҳолашидан хавотирдамисиз, деган саволга Байден буни инкор қилишини айтди. Шу билан бирга, яқин орада Си Цзиньпин билан гаплашасизми, деган саволга Америка етакчиси: “Ҳа”, деб жавоб берди. Бироқ у суҳбат қачон ўтказилиши мумкинлигини айтмади.

Ўтган ҳафта Жейк Салливан Байден Бутунхитой халқ вакиллари йиғилиши тугаганидан кейин 13 март куни Хитой раҳбари билан телефон орқали гаплашиши кутилаётгани ҳақида айтганди.

АҚШ 2030 йиллар бошида Австралияга Virginиа синфидаги учта сувости кемасини етказиб беради. Улар ядро билан қуролланмайди, балки атом электр станциясига эга бўлади. Агар керак бўлса, уларнинг сони бештагача оширилиши мумкин. Австралия, шунингдек, 2027 йилдан бошлаб Америкадан тўрттагача, Британиядан битта сувости кемаларига мезбонлик қилади, бу эса Хитойни янада тийиб туриши керак. Бундан ташқари, мамлакатлар биргаликда Буюк Британия ва Австралияда қуриладиган янги турдаги атом сувости кемаси лойиҳасини ишлаб чиқади.

Россия ва Хитой АUKUS’ни бир неча бор танқид қилган. Уларнинг фикрича, ядровий сувости кемаси технологиясининг Канберрага ўтказилиши Ядро қуролини тарқатмаслик тўғрисидаги шартномага “катта зарар етказади”.