AQSH sudining federal hakamlar hay’ati ilgari Konnektikut shtati Nyu-Briten shahrida yashagan O‘zbekiston fuqarosini Suriyadagi fuqarolar urushida qatnashib halok bo‘lgan ukasi haqida huquq-tartibot idoralarining immigratsiya xizmati xodimlariga yolg‘on gapirganlikda aybdor deb topdi, deb yozmoqda CT Insider.
36 yoshli Sidiqjon Mamadjonov ushbu jinoyatlari uchun 25 yilgacha qamoq jazosiga hukm qilinishi mumkin, dedi amerikalik huquqshunos Vanessa Roberts Averiy. Qayd etilishicha, erkak 200 000 dollarlik garov evaziga ozod qilinadi, u hukm chiqarilgunga qadar Pensilvaniyada yashab turibdi.
Mamadjonov 2009-yil fevralida AQSHga ko‘chib kelgan va 2010-yil sentabrida qonunan doimiy rezidentga aylangan. 2013-yilning may oyida Mamadjonov AQSHdan Turkiyaning Istanbul shahriga uchgan va safari davomida yoki oldinroq u ukasi Saidjon Mamadjonov Suriyadagi fuqarolar urushida qatnashib halok bo‘lganidan xabar topgan, dedi AQSH prokuraturasi.
Sidiqjon Mamadjonov 2013-yil iyun oyida AQSHga qaytib keladi va 2013-yil iyul oyi boshida unga iPhone 4 rusumli telefon solingan paket yuborishadi. Telefonda Suriyadagi ukasi tasvirlangan bir nechta video va fotosuratlar, jumladan, ukasi harbiy kiyimda qurolini tozalayotgani tasvirlangan videolar, u o‘ldirilganidan keyin olingan surat bo‘lgan, deyiladi advokatura bayonotida.
Sidiqjon 2014-yilda Federal qidiruv byurosi (FQB) xodimlariga bergan intervyusida bir necha bor yolg‘on bayonotlar bergan, jumladan, ukasi tirik ekani, Turkiya yoki Dubayda yashayotgani, 2013-yil Turkiyada bo‘lganida ukasi bilan uchrashgani va safardan qaytganidan keyin ukasi unga paket jo‘natganini aytgan.
Ikki yil o‘tib, 2016-yil avgust oyida Sidiqjon Mamadjonov FQB maxsus agentlari bilan suhbatda yana paketni ukasidan olganini aytgan. Shuningdek, u agentlarga “Saidjonning qayerdaligini bilmasligi, AQSHdagi o‘zbekistonliklar Suriyaga jang qilish uchun ketayotgani haqida hech qanday gap eshitmaganini va Suriyaga ketayotgan o‘zbekistonliklar haqida bilmasligini aytgan”.
“O‘shanda Sidiqjon ukasi Saidjon o‘zbekistonliklar qatorida AQSHdan Suriyaga borib, fuqarolar urushida qatnashgani va halok bo‘lganini, ukasi paket jo‘natilgan sanadan oldin vafot etganini bilar edi”, — deydi advokatura.
O‘sha yili, 2016-yil oktabr oyida Sidiqjon Mamadjonov AQSH fuqaroligi va immigratsiya xizmati xodimi bilan ham fuqarolikka qabul qilish uchun topshirgan arizasi haqida gaplashgan.
“Mamadjonov yana ukasi to‘g‘risida yolg‘on maʼlumot berdi”, — deya maʼlum qildi AQSH prokuraturasi. Mamadjonov 2017-yilning 22-dekabrida hibsga olingan.
1-mart kuni Bridjport shahrida Sidiqjon Mamadjonov ustidan jinoiy ishi boshlandi. Hakamlar hay’ati Mamadjonovni huquq-tartibot idoralariga immigratsiya masalasida yolg‘on bayonot berganlikda aybdor deb topdi.
Izoh (0)