Rossiya rahbari Vladimir Putin Ukrainadagi urushni uzoq vaqtga, balki yillab davom ettirishga tayyor. Bu haqda AQSH Milliy razvedkasi direktori Avril Xeyns yillik hisobotga bag‘ishlangan yig‘ilishda aytib o‘tdi, deb xabar beradi CNN.
Uning so‘zlariga ko‘ra, Ukrainadagi urush “mislsiz vayronagarchilik o‘chog‘iga aylandi, unda hech bir tomon uzil-kesil harbiy ustunlikka ega emas”. Biroq, rasmiyning ta’kidlashicha, Rossiya prezidenti Vladimir Putin “ehtimol urushni yillab davom ettiradi”.
“Biz Rossiya harbiylarining bu yil katta hududiy yutuqlarga erishish uchun yetarli darajada o‘zini tiklay olishini kutmayapmiz, biroq Putin katta ehtimol bilan vaqtni o‘z foydasiga cho‘zishga umid qilmoqda”, — dedi Xeyns.
Avvalroq NATO rahbari Yens Stoltenberg Ukrainadagi urushning natijasi noma’lum ekani, ammo hozirda Putin o‘z ambitsiyalarini o‘zgartirgani borasida hech qanday alomat yo‘qligini ma’lum qilgandi.
“U tinchlikni xohlamaydi. U yangi urushni rejalashtirmoqda”, — deya ta’kidladi NATO yetakchisi.
Bunga qadar Stoltenberg Ukrainaning NATOdagi istiqbolini tasdiqlagan edi. Shu bilan birga, u Ukrainaning urushdagi g‘alabasi mamlakatni integratsiyalash va Yevroatlantika hamjamiyatiga to‘liq qo‘shishning yagona yo‘li ekanini aytgan.
Izoh (0)