AQSH sobiq prezidenti Donald Trampning aytishicha, “urushning oldini olish uchun” u Rossiyaga Ukraina hududining bir qismini olishga ruxsat bergan bo‘lardi. Bu haqda amerikalik siyosatchi Fox News boshlovchisi Shon Xenniti bilan suhbatda ma’lum qildi.
Uning yuksak ishonch bilan so‘zlagan nutqida, amaldagi prezident Jo Baydendan farqli o‘laroq, uning rahbarligi davrida Rossiya go‘yoki “hech narsani tortib olmagan bo‘lardi”.
Biroq Tramp agar Rossiyaga xorijiy davlatning bir qismini “berishga” to‘g‘ri kelsa, bunga rozi bo‘lishini qo‘shimcha qildi.
“Bilasizmi, Ukrainada rusiyzabon bo‘lgan ayrim hududlar bor, ochig‘ini aytganda, kelishish mumkin edi”, — dedi Amerika sobiq rahbari.
Tramp, shuningdek, AQSHning avvalgi prezidentlari davrida Rossiya Gruziya va Ukrainaning bir qismini bosib olganini, Bayden davrida esa Moskva butunlay “shvedcha stol”ga ega bo‘lganini ta’kidladi.
Tramp agar hozir o‘zi AQSH yetakchisi bo‘lganida, Rossiya urush boshlamagan bo‘lardi, degan fikrni bir necha bor bildirgan. Shuningdek, u agar kelgusi prezidentlik saylovlarida g‘alaba qozonsa, rossiyalik va ukrainalik hamkasblari Vladimir Putin hamda Vladimir Zelenskiyga harbiy mojaroni hal qilish masalasida qo‘ng‘iroq qilishga va’da bergan.
AQSHda navbatdagi prezidentlik saylovlari 2024-yilga mo‘ljallangan bo‘lib, an’anaviy tarzda noyabr oyida o‘tkaziladi, inauguratsiya esa 2025-yilning yanvar oyida bo‘lib o‘tadi. Tramp allaqachon prezidentlikka nomzodini e’lon qilgan.
Izoh (0)