Tbilisida maxsus kuchlar Rustaveli prospektidagi Gruziya parlamenti binosiga kirishga uringan namoyishchilarga qarshi suv purkagichlar va ko‘zni yoshlatuvchi gaz ishlatdi, deb yozmoqda Meduza.
Gruziyalik deputatlar tomonidan ko‘rib chiqilayotgan “xorijiy agentlar” to‘g‘risidagi qonun loyihasiga qarshi bo‘lganlar 8-mart oqshomida yana shahar markaziga to‘planishdi.
Mitingda “Strategiya Agmashenebeli” partiyasi yetakchisi Georgiy Vashadze hukumatga ultimatum qo‘yib, qonun loyihasini bir soat ichida qaytarib olishni va 7-mart kungi namoyishda hibsga olinganlarning hammasini ozod qilishni talab qildi. Ultimatum muddati tugaganidan keyin u deputatlarning 9-mart kungi yig‘ilishiga yo‘l qo‘ymaslik uchun namoyishchilarni parlament binosini o‘rab olishga chaqirdi.
Politsiya maxsus jihozlarni qo‘llaganidan so‘ng, namoyishchilar parlament binosidagi derazalarni sindirib, panjaralarni buzishga kirishdi.
Natijada maxsus kuchlar mitingni kuch bilan tarqatishni boshladi va namoyishchilarni parlament yaqinidagi maydonni tark etishga majbur qildi.
7-mart kuni Gruziya parlamenti mamlakatda tanqidlar to‘lqiniga sabab bo‘lgan “xorijiy agentlar” to‘g‘risidagi qonun loyihasini birinchi o‘qishda qabul qilgandi. Ovoz berish chog‘ida Tbilisidagi Rustaveli prospektidagi parlament binosi yonida bir necha ming kishi yig‘ildi. Politsiya namoyishchilarni suv purkagichlar va ko‘zni yoshlatuvchi gaz yordamida kuch bilan tarqatdi. Yakunda mayda bezorilik va ichki ishlar organlariga bo‘ysunmaslik bo‘yicha ma’muriy moddalar bilan ish qo‘zg‘atilgan 76 nafar shaxs qo‘lga olingani ma’lum qilindi. Yana bir namoyishchi politsiyachiga hujum qilganlikda ayblanib, hibsga olingan.
“Xorijiy agentlar” to‘g‘risidagi qonun loyihasiga muvofiq, Gruziyada “xorijiy agentlar” reyestri paydo bo‘ladi va unga 10 foizdan ortiq qismi xorijdan moliyalashtiriladigan barcha notijoriy yuridik shaxslar va OAVlar kiritiladi.
Qonun loyihasining ikkinchi variant — “Xorijiy agentlarni ro‘yxatga olish to‘g‘risi”dagi hujjatga ovoz berish 9-mart kuni bo‘lib o‘tadi.
Izoh (0)