Eron hukumati Ukrainadagi urushda ishlatish uchun Rossiyaga katta partiya o‘q-dorilarni yashirincha yetkazib bergan va bu ta’minotni davom ettirishni rejalashtirmoqda, deb yozadi Sky News kuch tuzilmalaridagi anonim manbaga tayanib.
Telekanal suhbatdoshining da’vo qilishicha, 10-yanvar kuni Rossiya bayrog‘i ostidagi “Musa Jalil” va “Begey” yuk kemalari Eron portidan qurol-yarog‘ ortilgan 200 ga yaqin transport konteynerlari bilan jo‘nab ketgan. 12-yanvar kuni kemalar Turkmaniston portlaridan biriga kirib, keyin Kaspiy dengizini kesib o‘tgan, 27-yanvar kuni Astraxan portiga yetib borgan, dedi manba.
Uning so‘zlariga ko‘ra, konteynerlarda 100 millionga yaqin turli o‘lchamdagi patronlar, shuningdek, raketa va artilleriya qurilmalari, granatomyotlar, minomyotlar va pulemyotlar uchun 300 mingga yaqin snaryadlar tashilgan. Bundan tashqari, bortda 10 000 ga yaqin zirhli nimcha va kaskalar bo‘lgan.
Ta’kidlanishicha, Moskva Tehronga o‘q-dori yetkazib berish uchun naqd pul to‘lagan.
Manba Rossiyaga yetkazilgan o‘q-dorilar miqdori haqida aytganlariga ishonchi komil ekanini bildirdi. Biroq telekanal buni mustaqil ravishda tekshirib, tasdiqlay olmasligini qayd etmoqda. Sky News intervyu olgan ekspertlardan biri o‘q-dorilar soni unga juda ko‘pdek tuyulganini aytdi.
Rossiya urushda Eron qurollaridan foydalanmoqda
Rossiya Ukrainadagi urushda Eron qurollaridan faol foydalanmoqda. 2022-yil kuzidan boshlab Rossiya Mudofaa vazirligi Ukrainadagi harbiy va energetika obyektlariga hujum qilish uchun Eronda ishlab chiqarilgan Shahed-131/136 kamikadze-dronlaridan foydalanmoqda, rus harbiylari ularning nomini “Geran-1” va “Geran-2” deb o‘zgartiradi.
2023-yilning fevralida The Guardian gazetasi Eron Rossiyaga qayta foydalanish mumkin bo‘lgan uzoq masofali hujumchi dronlar partiyasini topshirganini yozgandi. G‘arb ommaviy axborot vositalari Rossiya va Eron rasmiylari Rossiya hududida dronlarni ishlab chiqaruvchi zavod qurish imkoniyati bo‘yicha kelishib olgani haqida bir necha bor yozgan.
Shuningdek, Eron Rossiyaga uchish masofasi mos ravishda 300 va 700 kilometrni tashkil etuvchi “Fateh-110” va “Zulfiqor” ballistik raketalarini yetkazib bermoqchiligi xabar qilingan.
Izoh (0)