Gruziyadagi hukmron “Gruziya orzusi” partiyasi va parlamentda ko‘pchilik o‘ringa ega boshqa partiyalar mamlakatda ommaviy noroziliklarga sabab bo‘lgan “Xorijiy taʼsirning shaffofligi to‘g‘risida”gi qonun loyihasini qaytarib olishga qaror qildi.
“Qabul qilingan qonun loyihasi jamiyatda bahs-munozaralarga sabab bo‘lganini ko‘rib turibmiz. Yolg‘on mashinasi qonun loyihasini salbiy tomondan talqin qilib, aholining ma’lum qismini chalg‘itishga muvaffaq bo‘ldi. Qonun loyihasiga “Rossiya qonuni” degan noto‘g‘ri tamg‘a urildi va uning birinchi o‘qishda qabul qilinishi jamoatchilikning bir qismi nazarida Yevropa yo‘nalishidan chekinish sifatida ko‘rsatildi. Bundan tashqari, radikal kuchlar yoshlarning bir qismini noqonuniy faoliyatga jalb qilishga muvaffaq bo‘ldi”, — deyiladi tomonlarning qo‘shma bayonotida.
Gruziyada “xorijiy agentlar” to‘g‘risdagi qonun loyihasi va namoyishlar
Gruziyada “xorijiy agentlar” haqidagi qonun qabul qilinishiga qarshi ommaviy norozilik namoyishlari bir necha kundan beri davom etmoqda. Qonun loyihasi mamlakat parlamentiga ikki variantda kiritilgan. 7-mart kuni gruziyalik deputatlar “Xorijiy taʼsirning shaffofligi to‘g‘risida”gi qonun loyihasini birinchi o‘qishda qabul qildi. Loyihada Gruziyada “xorijiy agentlar” reyestrini yaratish ko‘zda tutilgan bo‘lib, unda 20 foizdan ortiq qismi chet eldan moliyalashtiriladigan barcha notijoriy yuridik shaxslar va ommaviy axborot vositalari ro‘yxati keltiriladi.
“Xorijiy agentlar to‘g‘risida”gi qonun loyihasining ikkinchi tahriri – “Chet el agentlarini ro‘yxatga olish to‘g‘risida”gi qonun loyihasi bo‘yicha 9-mart kuni ovoz berish rejalashtirilgan edi. Mazkur loyihaga ko‘ra, xorijdan mablag‘ oluvchi har qanday jismoniy va yuridik shaxslarga “xorijiy agent” maqomi berilishi mumkin.
7—8-mart kunlari Tbilisi markazida Rustaveli prospektidagi parlament binosi yaqinida ommaviy norozilik namoyishlari bo‘lib o‘tdi, unda politsiya ishtirokchilarga qarshi suv purkagichlar va ko‘zni yoshlatuvchi gaz ishlatgan. Mitinglar yakunida Gruziya Ichki ishlar vazirligi 133 kishining mayda bezorilik va politsiyaga bo‘ysunmaslik bo‘yicha ma’muriy moddalar bo‘yicha hibsga olingani haqida xabar berdi. Yana bir namoyishchi politsiyachiga hujum qilganlikda ayblanib, hibsga olingan. U yetti yilgacha qamoq jazosiga hukm qilinishi mumkin.
Izoh (0)