Dunyodagi eng yirik harbiy budjet (yiliga 800 milliard dollardan ortiq) va rivojlangan sanoatga qaramay, Vashingtonning harbiy zaxiralari Ukrainadagi urush sabab tugadi, uni tiklash uchun o‘nlab yil kerak bo‘lishi mumkin, deb yozmoqda The Washington Post.
Nashr bilan suhbatlashgan tahlilchilarning fikricha, Pentagon Amerika omborlaridan chiqarilgan va Ukrainaga olib kelingan qurol-yarog‘ zaxiralarini to‘ldirish uchun yetarlicha harakat qilmayapti. WP ma’lumotlariga ko‘ra, AQSH Qurolli kuchlari qo‘mondonligi vakillari mamlakat harbiy-sanoat kompleksining “mo‘rtligi”ga ochiq ishora qilmoqda, hozirgi qurol va o‘q-dorilar ishlab chiqarish hajmi asosiy zaxiralar tugashining oldini olish uchun yetarli bo‘lmasligi mumkin.
Ishlab chiqarish darajasining pastligi AQSHdan deylik, boshqariladigan raketalar, samolyotlar va jangovar dronlar kabi asosiy qurol tizimlari zaxirasini to‘ldirish uchun tinchlik davridagi darajada 15 yil, urush davridagida esa sakkiz yildan ko‘proq vaqt talab etadi.
WP urush davom etayotgan bir yilda Amerikaning Ukrainaga harbiy yordami rekord darajada 30 milliard dollarga yetgani va qurollarning katta qismi Pentagon zaxiralaridan olinganini eslatdi.
“Ayni paytda, Ukrainaga qurol yetkazib berishni hisobga olmaganda ham, AQSHning ko‘plab qurol tizimlari uzoq vaqtdan beri almashtirishga muhtoj”, — deb yozadi gazeta. Ma’lumotlarga ko‘ra, joriy ishlab chiqarish darajasi AQSHning UH-60 Black Hawk vertolyotlari parkini almashtirish uchun 10 yildan ko‘proq vaqtni va zamonaviy o‘rta masofaga mo‘ljallangan “havo-havo” raketalarini almashtirish uchun qariyb 20 yilni oladi. Shu bilan birga, Pentagonga aviatashuvchilar parkini almashtirish uchun kamida 44 yil kerak bo‘ladi.
Nashrning tushuntirishicha, Ikkinchi jahon urushidan keyin, o‘nlab yillar davomida harbiy xarajatlar qisqargan, harbiy-sanoat majmuasi keskin kamaygan. Xususan, 1990-yillarda ushbu sektorda 51 ta yirik kompaniya bo‘lgan bo‘lsa, hozirgi kunda beshga yaqin shunday kompaniyalar qolgan.
Rossiyaning Ukrainadagi bosqini boshlanganidan so‘ng, Qo‘shma Shtatlar hamda G‘arb ittifoqchilari Moskvaga qarshi sanksiyalar kiritdi va harbiy yordamni oshirdi. AQSH prezidenti Jo Bayden Ukrainaga “qancha kerak bo‘lsa, shuncha” yordam ko‘rsatishga va’da berdi.
Izoh (0)