АҚШ судининг федерал ҳакамлар ҳайъати илгари Коннектикут штати Ню-Бритен шаҳрида яшаган Ўзбекистон фуқаросини Суриядаги фуқаролар урушида қатнашиб ҳалок бўлган укаси ҳақида ҳуқуқ-тартибот идораларининг иммиграция хизмати ходимларига ёлғон гапирганликда айбдор деб топди, деб ёзмоқда CТ Insider.
36 ёшли Сидиқжон Мамаджонов ушбу жиноятлари учун 25 йилгача қамоқ жазосига ҳукм қилиниши мумкин, деди америкалик ҳуқуқшунос Ванесса Роберц Аверий. Қайд этилишича, эркак 200 000 долларлик гаров эвазига озод қилинади, у ҳукм чиқарилгунга қадар Пенсилванияда яшаб турибди.
Мамаджонов 2009 йил февралида АҚШга кўчиб келган ва 2010 йил сентябрида қонунан доимий резидентга айланган. 2013 йилнинг май ойида Мамаджонов АҚШдан Туркиянинг Истанбул шаҳрига учган ва сафари давомида ёки олдинроқ у укаси Саиджон Мамаджонов Суриядаги фуқаролар урушида қатнашиб ҳалок бўлганидан хабар топган, деди АҚШ прокуратураси.
Сидиқжон Мамаджонов 2013 йил июнь ойида АҚШга қайтиб келади ва 2013 йил июль ойи бошида унга iPhone 4 русумли телефон солинган пакет юборишади. Телефонда Суриядаги укаси тасвирланган бир нечта видео ва фотосуратлар, жумладан, укаси ҳарбий кийимда қуролини тозалаётгани тасвирланган видеолар, у ўлдирилганидан кейин олинган сурат бўлган, дейилади адвокатура баёнотида.
Сидиқжон 2014 йилда Федерал қидирув бюроси (ФҚБ) ходимларига берган интервьюсида бир неча бор ёлғон баёнотлар берган, жумладан, укаси тирик экани, Туркия ёки Дубайда яшаётгани, 2013 йил Туркияда бўлганида укаси билан учрашгани ва сафардан қайтганидан кейин укаси унга пакет жўнатганини айтган.
Икки йил ўтиб, 2016 йил август ойида Сидиқжон Мамаджонов ФҚБ махсус агентлари билан суҳбатда яна пакетни укасидан олганини айтган. Шунингдек, у агентларга “Саиджоннинг қаердалигини билмаслиги, АҚШдаги ўзбекистонликлар Сурияга жанг қилиш учун кетаётгани ҳақида ҳеч қандай гап эшитмаганини ва Сурияга кетаётган ўзбекистонликлар ҳақида билмаслигини айтган”.
“Ўшанда Сидиқжон укаси Саиджон ўзбекистонликлар қаторида АҚШдан Сурияга бориб, фуқаролар урушида қатнашгани ва ҳалок бўлганини, укаси пакет жўнатилган санадан олдин вафот этганини билар эди”, — дейди адвокатура.
Ўша йили, 2016 йил октябрь ойида Сидиқжон Мамаджонов АҚШ фуқаролиги ва иммиграция хизмати ходими билан ҳам фуқароликка қабул қилиш учун топширган аризаси ҳақида гаплашган.
“Мамаджонов яна укаси тўғрисида ёлғон маълумот берди”, — дея маълум қилди АҚШ прокуратураси. Мамаджонов 2017 йилнинг 22 декабрида ҳибсга олинган.
1 март куни Бриджпорт шаҳрида Сидиқжон Мамаджонов устидан жиноий иши бошланди. Ҳакамлар ҳайъати Мамаджоновни ҳуқуқ-тартибот идораларига иммиграция масаласида ёлғон баёнот берганликда айбдор деб топди.
Изоҳ (0)