Yaponiyada tug‘ilishlar soni 2022-yilda antirekord o‘rnatdi

Yaponiyada 2022-yilda rekord darajada kam bolalar tug‘ildi, mamlakatda tug‘ilish tendensiyasi yetti yildan beri pasayib kelmoqda va jamiyatning tez qarishi muammosini yanada kuchaytirmoqda, deb yozadi Bloomberg Yaponiya Sog‘liqni saqlash vazirligi ma’lumotlariga tayanib.

Agentlik maʼlumotlariga ko‘ra, yangi tug‘ilgan chaqaloqlar soni 2022-yilda 799 728 nafarga tushib, avvalgi yilga nisbatan 5,1 foizga kamaygan va bu 1899-yildan boshlangan kuzatuvlar tarixidagi eng past ko‘rsatkichdir.

Shu bilan bir qatorda, ayni davrda vafot etganlar soni 8,9 foizga oshib, 1,58 million kishini tashkil etdi.

“Biz tug‘ilish darajasining pasayishi juda dolzarb vaziyat ekanini tan olamiz. Tushunishimcha, bir-biriga chambarchas bog‘liq bo‘lgan turli omillar odamlarning turmush qurish, farzand ko‘rish va ularni tarbiyalash umidlarini ro‘yobga chiqarishiga to‘sqinlik qilmoqda”, — dedi Yaponiya Vazirlar Mahkamasi bosh kotibi o‘rinbosari Yoshixiko Isozaki.

Agentlikning ta’kidlashicha, tug‘ilishning pasayishi Yaponiyada dunyodagi uchinchi yirik iqtisodiyotni qo‘llab-quvvatlash uchun kelgusi yillarda ishchi kuchi va soliq to‘lovchilarning kamayishini anglatadi. Shu bilan birga, aholining boshqa mamlakatlardagidan ko‘ra ko‘proq qismini tashkil etuvchi keksalarga g‘amxo‘rlik qilish xarajatlari ortib borayotgani milliy g‘aznani quritmoqda.

Isozakining ta’kidlashicha, hukumat bolalar va ota-onalar siyosatini ishlab chiqadi va iyun oyiga qadar budjetini ikki baravar oshirish uchun asos yaratadi.

Nikkei nashri 2022-yilning dekabr oyida Yaponiya hukumati oila va bolalar masalalari bilan shug‘ullanuvchi yangi agentlikka budjetdan 35,2 milliard dollar ajratgani haqida xabar bergandi.

Bloomberg ta’kidlashicha, qo‘shni davlatlar ham xuddi shunday muammolarga duch kelmoqda. Xususan, Xitoy aholisi 2022-yilda 60 yil ichida birinchi marta qisqardi. O‘tgan oy Milliy statistika byurosi tomonidan e’lon qilingan ma’lumotlarga ko‘ra, 2022-yil oxirida xitoyliklar 1,41 milliard kishini tashkil etdi, bu avvalgi yilga nisbatan 850 000 ga kam. 

Janubiy Koreyada ko‘p yillardan beri dunyodagi eng past tug‘ilish darajasi qayd etilmoqda. 2022-yilda har bir ayolga 0,78 bola to‘g‘ri keldi, bu esa aholining qarishi bilan bog‘liq iqtisodiy muammolarni yanada kuchaytirdi.