Buyuk Britaniyaning sobiq bosh vaziri Boris Jonson otasi Stenli Jonsonni ritsarlikka nomzod qilib ko‘rsatdi. Bu haqda manbalarga tayanib, The Times xabar bermoqda.
Jonson sobiq bosh vazir sifatida, o‘zi ritsar bo‘lishga loyiq deb hisoblagan shaxslarni nomzod qilib ko‘rsatishi mumkin. Gazetaning yozishicha, siyosatchi 100 ga yaqin ismlar ro‘yxatini tuzgan bo‘lib, ular orasida 82 yoshli otasi ham bor. 2016—2019-yillarda bosh vazir bo‘lib ishlagan Tereza Mey o‘z ro‘yxatiga bor-yo‘g‘i 60 nafar, hukumatning yana bir sobiq rahbari Devid Kemeron esa 62 nafar odamni kiritgan, deb yozadi gazeta.
Bu unvon Jonsonning otasiga berilsa, siyosatchiga qarshi yangi daʼvolar boshlanishi mumkin, deb yozadi gazeta. Avval, 2020-yilda Jonsonning akasi Jozef bilan ham shunday bo‘lgan, u sobiq bosh vazirning taklifiga binoan Lordlar palatasidan o‘rin olgandi, deb yozadi gazeta. Jozef Jonson Merilbon baroni unvoniga ega.
Sobiq bosh vazirlar tomonidan ilgari surilgan nomzodlar Britaniya Vazirlar Mahkamasi kotibiyatining taqdirlash komissiyasi tasdig‘idan o‘tadi, keyin ro‘yxat amaldagi bosh vazir tomonidan tasdiqlanadi. Shundan so‘ng, ro‘yxat imzolash uchun qirolga yuboriladi.
Jonson 2019-yilning yozida Britaniya bosh vaziri lavozimida ish boshlagan va 2022-yil iyulida isteʼfoga chiqishini eʼlon qilgandi. Bu hukmron Konservativ partiyaning Jamoatlar palatasida sobiq bosh tashkilotchi o‘rinbosari Kris Pincher bilan bog‘liq janjal fonida Britaniya hukumatining o‘nlab amaldorlari ishdan bo‘shatilishi ortidan sodir bo‘ldi. Pincher Londonning elita konservativ klubi “Karlton”da mast holda mushtlashgan va ikki erkakni haqorat qilgan. Bu haqda ommaga ma’lum bo‘lgach, Pincher uzr so‘radi va iste’foga chiqdi.
Keyinchalik ma’lum bo‘lishicha, Jonson Pincherni yuqori lavozimga tayinlash chog‘ida u parlament tekshiruvi ostida ekanini bilgan. Jonson Sky News telekanaliga bergan intervyusida saylovchilardan uzr so‘radi va Pincherni tayinlash bo‘yicha qarorlaridan afsusda ekanini aytdi.
Izoh (0)