Ukrainadagi urush o‘t ochishni to‘xtatish haqidagi bitim imzolangandan keyingina tugashi mumkin, dedi Vengriya tashqi ishlar vaziri Peter Siyyarto SVT telekanali efirida.
“Birinchi maqsad — odamlarni o‘ldirishni to‘xtatish, bu o‘t ochishni to‘xtatish bo‘yicha kelishuvni anglatadi, boshqa narsa yo‘q”, — dedi u.
Uning qayd etishicha, Yevropa sanksiyalari mojaroni to‘xtata olmaydi.
Shuningdek, u Vengriya urush tomonlariga qurol jo‘natmayotgani, faqat tinchlik tarafdori ekanini qo‘shimcha qildi.
Fevral oyi oxirida Xitoy Tashqi ishlar vazirligi Ukrainadagi mojaroni hal qilish bo‘yicha 12 banddan iborat reja eʼlon qilgandi. Unda, jumladan, harbiy harakatlarni to‘xtatish, eskalatsiyadan tiyilish, Moskva va Kiyev o‘rtasidagi muzokaralarni qayta boshlash nazarda tutilgan edi. Undan sal avval Xitoyning Birlashgan Millatlar Tashkilotidagi doimiy vakili Chjan Szyuan o‘t ochishni to‘xtatishga chaqirdi.
Xitoy rejasi e’lon qilinganidan so‘ng Ukraina prezidenti ofisi rahbari Andrey Yermak Kiyev Pekin tashabbusiga shubha bilan qarayotganini aytdi.
“Rossiya sulhdan har doim mojaroni muzlatib turish uchun foydalanadi”, — dedi u.
Ukraina prezidenti Vladimir Zelenskiy Rossiya qo‘shinlarining mamlakat hududidan olib chiqilishini “o‘t ochishni to‘xtatishning kafolatlangan va ishonchli usuli” deb atadi.
Izoh (0)