Японияда 2022 йилда рекорд даражада кам болалар туғилди, мамлакатда туғилиш тенденцияси етти йилдан бери пасайиб келмоқда ва жамиятнинг тез қариши муаммосини янада кучайтирмоқда, деб ёзади Bloomberg Япония Соғлиқни сақлаш вазирлиги маълумотларига таяниб.
Агентлик маълумотларига кўра, янги туғилган чақалоқлар сони 2022 йилда 799 728 нафарга тушиб, аввалги йилга нисбатан 5,1 фоизга камайган ва бу 1899 йилдан бошланган кузатувлар тарихидаги энг паст кўрсаткичдир.
Шу билан бир қаторда, айни даврда вафот этганлар сони 8,9 фоизга ошиб, 1,58 миллион кишини ташкил этди.
“Биз туғилиш даражасининг пасайиши жуда долзарб вазият эканини тан оламиз. Тушунишимча, бир-бирига чамбарчас боғлиқ бўлган турли омиллар одамларнинг турмуш қуриш, фарзанд кўриш ва уларни тарбиялаш умидларини рўёбга чиқаришига тўсқинлик қилмоқда”, — деди Япония Вазирлар Маҳкамаси бош котиби ўринбосари Ёшихико Исозаки.
Агентликнинг таъкидлашича, туғилишнинг пасайиши Японияда дунёдаги учинчи йирик иқтисодиётни қўллаб-қувватлаш учун келгуси йилларда ишчи кучи ва солиқ тўловчиларнинг камайишини англатади. Шу билан бирга, аҳолининг бошқа мамлакатлардагидан кўра кўпроқ қисмини ташкил этувчи кексаларга ғамхўрлик қилиш харажатлари ортиб бораётгани миллий ғазнани қуритмоқда.
Исозакининг таъкидлашича, ҳукумат болалар ва ота-оналар сиёсатини ишлаб чиқади ва июнь ойига қадар бюджетини икки баравар ошириш учун асос яратади.
Nikkei нашри 2022 йилнинг декабрь ойида Япония ҳукумати оила ва болалар масалалари билан шуғулланувчи янги агентликка бюджетдан 35,2 миллиард доллар ажратгани ҳақида хабар берганди.
Bloomberg таъкидлашича, қўшни давлатлар ҳам худди шундай муаммоларга дуч келмоқда. Хусусан, Хитой аҳолиси 2022 йилда 60 йил ичида биринчи марта қисқарди. Ўтган ой Миллий статистика бюроси томонидан эълон қилинган маълумотларга кўра, 2022 йил охирида хитойликлар 1,41 миллиард кишини ташкил этди, бу аввалги йилга нисбатан 850 000 га кам.
Жанубий Кореяда кўп йиллардан бери дунёдаги энг паст туғилиш даражаси қайд этилмоқда. 2022 йилда ҳар бир аёлга 0,78 бола тўғри келди, бу эса аҳолининг қариши билан боғлиқ иқтисодий муаммоларни янада кучайтирди.
Изоҳ (0)