Belarus xavfsizlik kuchlari mamlakatda ommaviy tintuv o‘tkazmoqda. So‘nggi uch yil davomida ma’muriy va siyosiy moddalar bilan ta’qibga uchraganlarning barchasi gumon ostida. Bu haqda “Vyasna” inson huquqlari markazi xabar berdi.
Huquq himoyachilari ta’kidlashicha, xavfsizlik kuchlarining bunday ommaviy reydiga Belarusning Machulishi aerodromida joylashgan A-50 Rossiya radar samolyotining ishdan chiqarilishi sabab bo‘lgan.
“Kecha va bugun Minsk viloyatida Davlat xavfsizlik qo‘mitasi (KGB) xodimlari Machulishida hujumga uchragan samolyot bo‘yicha qidiruv va hibsga olish ishlarini olib bormoqda. KGB xodimlari 2020-yildan 2023-yilgacha maʼmuriy va siyosiy moddalar bo‘yicha jinoiy javobgarlikka tortilganlarning barchasini hibsga olmoqda”, — deyiladi 5-mart kuni berilgan xabarda.
Huquq himoyachilarining dastlabki ma’lumotlariga ko‘ra, kamida 10 kishi hibsga olingani ma’lum, tintuvlardan so‘ng ular KGB hibsxonasiga jo‘natilgan.
Avvalroq partizanlar Belarusda Rossiyaning A-50 samolyotiga qilingan hujum videosini namoyish qilgandi. Unda dronning Machulishi aerodromi ustidan bemalol uchayotganini ko‘rish mumkin.
26-fevral kuni Rossiyaning A-50 radar va boshqaruvchi samolyoti Machulishidagi aerodromda dronlarning hujumidan shikastlangani haqida xabar berilgandi. OAV xabarlariga ko‘ra, sabotajda belarus partizanlari ishtirok etgan.
Izoh (0)