AQSHda 30 yildan ortiq vaqt davomida bedarak yo‘qolgan va hatto rasman o‘lik deb topilgan pensilvaniyalik ayol Puerto-Rikoda tirik holda topildi. Bu haqda The New York Times xabar berdi.
Sirli g‘oyib bo‘lish hollari ko‘pincha bedarak yo‘qolganlarning tirik topilishiga olib kelmaydi. Ammo 83 yoshli Patrisiya Kopta bundan mustasno edi. Hozir u bedarak yo‘qolgan joydan 2700 kilometr uzoqlikdagi qariyalar uyida demensiya (bosh miyaning zararlanishi oqibatida yuzaga keladi va aqliy qobiliyat sezilarli darajada pasayadi) kasalligidan davolanmoqda. U qariyalar uyi xodimlariga o‘zining hayoti haqida aytib bergan, shundan so‘ng ular tergovchilar bilan bog‘lanib, 1992-yilda yo‘qolgan ayol, ehtimol qariyalar uyidagi Patrisiya Kopta ekanini bildirgan.
Koptaning singlisi Gloriya Smit politsiya DNK dalillari orqali uning opasi haqiqatan ham Puerto-Rikoda ekanini aniqlaganida, o‘zini qanday his qilgani haqida aytgan. “Shokda edim. Men bunga ishonmadim”, — dedi u.
Bedarak yo‘qolgan ayolning eri Bob Kopta u bilan 20 yil hayot kechirgan. U ham rafiqasi tirikligiga ishonchsizlik bildirgan. “O‘ttiz bir yil va bu juda yomon holat edi”, — dedi u.
Koptaning oilasi va politsiyaga ko‘ra, u 52 yoshida g‘oyib bo‘lgunga qadar ruhiy salomatlik bilan bog‘liq muammolarga duch kelgan.
“U oila a’zolariga ketayotgani, shahardagi qariyalar muassasasiga joylashtirilishidan xavotirda ekani haqida aytgan”, — dedi Ross shahar politsiya boshqarmasi boshlig‘i Brayan Kolxep.
1999-yilda, u bedarak yo‘qolganidan yetti yil o‘tib, qariyalar uyi xodimlari Kopta xonimni Puerto-Riko ko‘chalarida kezib yurganida aniqlagan.
“U shaxsiy hayoti yoki kelib chiqishini qariyalar uyi xodimlari bilan muhokama qilishdan bosh tortgan”, — dedi politsiya.
O‘shanda ayolning eri va qarindoshlari uning o‘lgan bo‘lishi mumkinligiga ishongan.
“Bu barchamiz uchun qiyin edi, chunki onam, singlim va men, doimo u haqida qayg‘urardik”, — deydi Koptaning singlisi
Qariyalar uyi xodimlari Koptaning DNK surtmasini olib, tergovchilarga yuborgan. Keyin Smit xonim va Kopta xonimning jiyanidan DNK namunalari olingan. Namunalar laboratoriyaga yuborilgan, u yerda oilaviy test Puerto-Rikodagi ayol haqiqatan ham Kopta xonim degan xulosaga kelgan. Natijalar qaytib kelmasidan oldin ham, tergovchilar bir necha oy davomida Puerto-Rikodagi fotosuratdagi keksa ayol Kopta xonim ekaniga ishongan, uning 90-yillardagi uzun jigarrang sochlari endi qirqilgan va oqarib ketgan.
Smit xonim yaqinda Puerto-Rikodagi opasi bilan ko‘rishini aytdi. Janob Kopta ham xotiniga nima bo‘lganini bilishdan mamnun ekanini bildirdi.
“30 yildan keyin bu haqda unutishga harakat qilasiz. Endi men buni unutishim mumkin. Biz nima bo‘lganini bilamiz va hozir unga g‘amxo‘rlik qilinmoqda”, — deydi u.
Izoh (0)