AQSH Davlat kotibi Entoni Blinken yuqori martabali xitoylik diplomat Van I bilan uchrashib, havo shari va Rossiya borasida Xitoyni ogohlantirdi. Bu haqda Sky News xabar berdi.
Bir soat davom etgan uchrashuv Germaniyada bo‘lib o‘tdi, u yerda siyosatchilar xalqaro xavfsizlikning eng dolzarb masalalarini muhokama qiladigan Myunxen xavfsizlik konferensiyasida ishtirok etdi.
“Men unga Xitoyning suverenitetimizni, xalqaro huquqni buzgan holda AQSH ustidan kuzatuv shari uchirishni qabul qilib bo‘lmasligi va bu hech qachon takrorlanmasligi kerakligini tushuntirdim”, — dedi Blinken
Shuningdek , AQSH Davlat kotibi prezident Jo Baydenning Vashington “yangi sovuq urush” kutayotgani yo‘qligi, balki mamlakat “o‘z qadriyatlari va manfaatlarini uyalmasdan himoya qilishi” haqidagi so‘zlarini takrorladi.
Blinken uchrashuvda Vashington Xitoy sanksiyalarni chetlab o‘tib, Rossiyaga harbiy yordam yetkazib berishni boshlashidan xavotirdaligini bildirdi. Siyosatchi Xitoy Tashqi ishlar vazirligi rahbarini Rossiyaga qurol yetkazib berilgan taqdirda qanday oqibatlarga olib kelishi haqida ogohlantirdi va bunday qadam AQSH-Xitoy munosabatlarini ancha murakkablashtirishini qayd etdi. Vitse-prezident Kamala Xarris ham Xitoy-Rossiya yaqin hamkorligidan xavotir bildirgan.
4-fevral kuni AQSH harbiylari Atlantika okeani ustida sharni urib tushirdi. Keyinroq AQSH Davlat departamenti urib tushirilgan shar elektron razvedka uskunalari bilan jihozlangani va Xitoy razvedka dasturining bir qismi ekanini ma’lum qilgandi.
Izoh (0)