“Xayrlashmay chiqib ketdim”: Almazbek Atambayev Qirg‘iziston sobiq prezidentlarining Dubaydagi uchrashuviga izoh berdi

Almazbek Atambayev Qirg‘izistonning amaldagi va sobiq prezidentlari bilan uchrashuvning ayrim tafsilotlarini aytib berdi. U mamlakatda tinchlik, birdamlik o‘rnatilishi va Bakiyevlarning Qirg‘izistonga qaytishi ikkita katta farq ekanini ta’kidladi. Bu haqda “Kaktus Media” xabar berdi.

“So‘nggi voqealar va vatandoshlarning savollari yuzasidan quyidagilarni aytmoqchiman: Ha, sobiq prezidentlar yig‘ilishi bo‘ldi. Unda qatnashdim, chunki yig‘ilishda sobiq prezidentlardan birontasi ham bo‘lishi haqida xabar berilmagandi. Menga erkin odamlardek teng sharoitda, eski noroziliklarni unutib gaplashishimiz uchun prezident Sadir Japarov va Qamchibek Tashiyev bilan uchrashuvga taklif qilishdi. Men yaxshilikni eslab qolaman, shuning uchun uni rad eta olmadim, hatto Ispaniya elchisi bilan vizalar bo‘yicha oldindan rejalashtirilgan uchrashuvni bekor qildim. Ma’lumki, bosh vazir Pedro Sanches meni Ispaniyaga davolanishga taklif qildi, buning uchun unga katta rahmat!

Men ham yurt tinchligi va birdamligi tarafdoriman. Uchrashuvda shu haqda ham gapirdim. Prezident Japarovning yaxshi niyatdaligini qadrlayman. Ammo uchrashuv yakunida shunday vaziyat yuzaga keldiki, hech kim bilan xayrlashmay, inglizcha ketishga majbur bo‘ldim. Kelajakda zarurat tug‘ilsa, albatta, batafsil ma’lumot beraman”, — deydi Atambayev.

Shuningdek, sobiq prezident Qirg‘izistonda tinchlik, hamjihatlikning o‘rnatilishi va Bakiyevlarning Qirg‘izistonga qaytishi ikki katta farqligini aytdi.

“Birlashtirish butunlay boshqacha natija beradi. Juda ko‘p qon to‘kilgan, juda ko‘p narsani unutmaslik kerak va unutib bo‘lmaydi. Albatta, jinoyatchilar javob berishi kerak va bunda qurbonlarning yaqinlari birinchilardan bo‘lib kechirishi kerak. Umid qilamanki, prezident Sadir Japarov meni eshitdi va to‘g‘ri qaror qabul qiladi”, — dedi sobiq prezident.

Avvalroq Qirg‘izistonning amaldagi prezidenti Sadir Japarov Qirg‘izistonning barcha prezidentlarini bir joyga yig‘ib, uchrashuv o‘tkazganini ma’lum qilgandi. Unda Asqar Akayev, Qurmanbek Bakiyev, Roza O‘tunboyeva, Almazbek Atambayev va So‘ronbay Jeenbekov ishtirok etgan. Japarov sobiq prezidentlar o‘z e’tirozlari, alamlarini bildirgani, shu bilan birga xatolarini tan olib, bir-birini kechirganini aytgandi.