11-fevral oqshomida Shimoliy Amerika aerokosmik mudofaa birlashgan qo‘mondonligi Kanada havo hududida noma’lum uchar apparatni tushirdi. Bu haqda Kanada bosh vaziri Jastin Tryudo ma’lum qildi.
Kanada mudofaa vaziri Anita Anandning aytishicha, obyekt taxminan 12 kilometr balandlikda uchgan va mamlakat shimoli-g‘arbida, AQSH—Kanada chegarasidan taxminan 160 kilometr uzoqlikda urib tushirilgan. Mamlakat Qurolli kuchlari va Qirollik otliq politsiyasi uchar apparatni o‘rganish uchun uning qoldiqlarini yig‘ish operatsiyasini boshlagan.
Bu so‘nggi haftada amerikalik harbiylar tomonidan urib tushirilgan uchinchi obyekt: 4-fevral kuni AQSH Xitoyning razvedkachi havo sharini urib tushirgandi, 10-fevralda esa Alyaska uzra yana bir noma’lum uchar apparat urib tushirildi.
Fevral oyi boshida AQSH rasmiylari amerikalik harbiylar bir necha kundan beri mamlakat havo hududida uchayotgan Xitoy sharini kuzatayotgani haqida xabar bergandi. Keyinroq Xitoy Tashqi ishlar vazirligi bu tadqiqot shari ekani, u yo‘lidan og‘ib, tasodifan AQSH hududiga kirib qolganini da’vo qildi.
4-fevral kuni AQSH harbiylari Atlantika okeani ustida sharni urib tushirdi. Keyinroq AQSH Davlat departamenti urib tushirilgan shar elektron razvedka uskunalari bilan jihozlangani va Xitoy razvedka dasturining bir qismi ekanini ma’lum qildi.
Izoh (0)