Bolgariya poytaxti Sofiya yaqinida tashlab ketilgan yuk mashinasi ichidan 18 nafar afg‘on muhojirining jonsiz jasadi aniqlandi. Bu haqda Reuters xabar berdi.
Ma’lum qilinishicha, yuk mashinasi ichida 52 nafar afg‘onistonlik noqonuniy muhojir bo‘lgan, ulardan 18 nafari, jumladan bir bola halok bo‘lgan. 34 nafar qochqin kasalxonaga yotqizilgan. Hozirda 19 kishi shifokorlar nazoratida qolmoqda, qolganlari qochqinlarni joylashtirish markazlariga yuborilgan.
“Tekshiruv boshlanganidan buyon o‘tgan 24 soat davomida noqonuniy migratsiyani tashkil etgan jinoiy guruhning faoliyati fosh etildi. U olti kishidan iborat bo‘lib, mustaqil ravishda yuk mashinalarida migrantlarni tashish, ularni har oyda ikki marta tashish uchun yashirinish joylari tashkil qilgan. Bu safar avtomobil kuzoviga odatdagidek 30 emas, balki 50 dan ortiq odam ortilgan.
Harakat boshlanganidan bir soat o‘tgach, yuk mashinasi haydovchilari kuzovdagi shovqinni eshitib, nima bo‘layotganini tekshirish uchun to‘xtagan va muhojirlarning bir qismi halok bo‘lganini aniqlagan. Ular yuk mashinasini tashlab, voqea joyidan qochib ketgan”, — dedi Milliy tergov xizmati direktori Borislav Sarafov.
Uning so‘zlariga ko‘ra, 52 nafar migrant havo yetishmaydigan qattiq yashirin joyda bo‘lgan va ulardan 18 nafari bir soat ichida vafot etgan. Tekshiruv natijasida muhojirlarning har biri Yevropaga borish uchun 5000 yevrodan 7000 yevrogacha pul to‘lagani aniqlangan.
Afg‘onistonni nazorat qilayotgan “Tolibon” harakatining Tashqi ishlar vazirligi holat yuzasidan munosabat bildirgan. Ular Bolgariya hukumatini Afg‘onistondan kelgan muhojirlarning o‘limida aybdorlarni jazolashga chaqirgan.
“Biz barcha xalqaro tashkilotlar va Bolgariyadan odam savdogarlarini qo‘lga olib, qonun qo‘liga topshirishini istaymiz”, — deyiladi “Tolibon” murojaatida.
Izoh (0)