Sog‘liqni saqlash vaziri Amrillo Inoyatovning “Bemorga mehr bilan yondoshsangiz, rozi bo‘lib, o‘zi sizga berib ketadi” mazmunidagi fikriga Korrupsiyaga qarshi kurashish agentligi Jamoatchilik kengashi munosabat bildirdi.
Qayd etilishicha, sog‘liqni saqlash tizimida korrupsiyani kamaytirish Sog‘liqni saqlash vazirligi, Korrupsiyaga qarshi kurashish agentligi, keng jamoatchilikning, xususan, agentlik huzuridagi jamoatchilik kengashining kun tartibidagi asosiy masalalardan biri bo‘lib turibdi.
Shu boisdan 25-yanvar kuni mas’ul tuzilmalar hamda agentlik huzuridagi jamoatchilik kengashi, OAV vakillari ishtirokida muloqot tashkil etilib, korrupsiyani bartaraf etishga qaratilgan aniq choralar belgilab olindi. Jamoatchilik kengashi Sog‘liqni saqlash vazirligi rahbariyatining korrupsiyaning oldini olish bo‘yicha boshlagan ishlarini qo‘llab-quvvatlagan.
Shu bilan birga, sharafli kasb egalari – shifokorlarni rag‘batlantirish yo‘llaridan biri sifatida bemorlar bergan mablag‘ning e’tirof etilishini qonunchilikka va mamlakatda olib borilayotgan korrupsiyaga qarshi kurashish siyosatiga zid harakat sifatida qayd etgan. Mazkur taklif tizimda korrupsiyaviy jinoyatlar sonining ortishiga hamda shifokor kasbi mavqeining pasayishiga, sog‘liqni saqlash tizimiga xalqning ishonchi kamayishiga sabab bo‘lishi mumkin.
Korrupsiyaga qarshi kurashish agentligi, Sog‘liqni saqlash vazirligi va Davlat xizmatini rivojlantirish agentligining qo‘shma bayonotida “Tibbiyot xodimlariga munosib mehnat sharoitini yaratish va daromadini oshirish, shuningdek, ularning ijtimoiy himoyasini kuchaytirish bo‘yicha amaliy choralar ko‘rish, bunda, tibbiyot xodimlari malakasiga, ko‘rsatiladigan tibbiy xizmat hajmi, murakkablik darajasi va sifatiga qarab mehnatga haq to‘lashning toifalangan zamonaviy mexanizmlarini joriy etish” belgilangan.
Jamoatchilik kengashi shifokorlarni rag‘batlantirishda bemorlardan pul olish singari (ixtiyoriy yoki ixtiyoriy emasligidan qat’iy nazar) noqonuniy xatti-harakatlarni bartaraf etish hamda haq to‘lashning toifalangan mexanizmini joriy etish Sog‘liqni saqlash vazirligining asosiy maqsadi bo‘lishi lozimligini bildirgan. Shuningdek, ushbu masala ustidan jamoatchilik nazorati o‘rnatilishi ma’lum qilingan.
Telegram’dagi “Safar” kanalining yozishicha, bu masalada muammo Sog‘liqni saqlash vazirida emas. Muallif Inoyatovning shifokorlarning oyligi va odamlar pul berishi haqidagi so‘zlari nega bunchalik muhokama qilinayotganiga hayron bo‘lganini bildirgan.
“Bu gaplarning nimasi yangilik? Qaysi davrda shunaqa bo‘lmagan? Kim do‘xtirning cho‘ntagiga Inoyatovning iborasi bilan aytganda, “so‘ramasa ham, rozi bo‘lib, barakasini berib” ketmagan? Shifokorning cho‘ntagiga solinayotgan pul nima deb atalishi va bu gapni kim aytayotganidan qat’i nazar, bu holat bor. Buni hammamiz bilamiz. Kecha ham bor edi, ertaga ham bo‘ladi. Shu gapni vazir aytgani uchun u aybdor bo‘lib qolmaydi. Chunki muammo aslida unda emas, yillarki o‘nglanmayotgan tizimda. Tizimni to‘g‘rilash uchun esa vaqt kerak. Haqiqat shuki, cho‘ntagida puli bor do‘xtirning ishiyam sifatli bo‘ladi. Vazir aytgan zo‘r do‘xtirlar, “o‘z brendini yaratgan” shifokorlar hozir ham yaxshi yashashyapti. Odamlar do‘xtirlarning cho‘ntagiga pul solishiga qarshi kurashishdan ko‘ra, sifatli tibbiyot haqida gaplashsak bo‘lardi. Sifatli narsa esa har doim qimmat bo‘ladi. Mayli, bu alohida mavzu”, — deyiladi postda.
Sog‘liqni saqlash vaziri Amrillo Inoyatov Farg‘onada tibbiyot sohasi vakillari va jurnalist bilan uchrashuv o‘tkazgandi. Inoyatov sog‘liqni saqlash tizimidagi rahbar xodimlarning maoshi haqida gapirib, rahbar-shifokorlardan biridan oyligi qanchaligini so‘ragan. Vazir shifokorning gapini eshitib, u aytgan 5,5 million so‘m oyligi va unga qo‘shimcha bemorlar beradigan haqni qo‘shganda yetarlicha summa chiqishiga ishonch bildirgan.
Izoh (3)
Хамма айибни вазирга юклашдан олдин ойлик маош тарифларини кайта куриб чикишни маслахат бераман. Олий тойфали хамшира Энди тугатиб келган шифокордан куп маош олади.
Xa vazir aytgan gap togri bu ishlar bolayotgandir lekin bu gaplariga qoshilish degani karrupsiyani qonunilashtirishkuu shunda shifokor pul berganga yaxshi momilada bolib bermaganga yuzaki baxo berishni tashxislarni chuqur organmay yuzaki qarashga otadi yana osha tabaqalanish shakillanadi. Xamma xam inson shifokor xam nafsi borr puli yoq odammga shifokorr BRENDI shakillangan bolsa xam pul berolmaydi chunki unda yoq pul duo qiladi chin kongildan, shifokor puli yoq bemorga bermagandan keyin albatta unga vaqt ajratmydi tabaqalaydi. Tizimni buzulishiga olib keladi buuu.
shifokorlarni rag‘batlantirish yo‘llaridan biri sifatida bemorlar bergan mablag‘ning e’tirof etilishini qonunchilikka va mamlakatda olib borilayotgan korrupsiyaga qarshi kurashish siyosatiga zid harakat sifatida baholayman.
Jizzax shaxrida yaqinda farzandli bo‘ldik. SHifokor chekka xonaga chaqirib pul talab qildi. Ma'lum miqforda suyunchi puli berdim Hamma berar ekan. Keyin bilsam kam bergan ekanman shekilli, vrach xam, xamshira xam biror marta xam ona va boladan xabar olmapdi. So‘rasam siz kam pul bergan ekansis dadasi, shuning uchun xech kim xabar olmadi. Ko‘proq pul berganlardan, doimiy xabar olib turdi deb aytdi.
Juda xolatdan xafa bo‘ldim Kim ko‘proq pul bersa shunga yaxshi qarar ekan. Kam berganga qaramas ekan.
Vazir shuni rivojlantirmoqchi shekilli.
Bu ish yaxshi emas deb o‘ylayman.