Andijonda hokimlik taklifi bilan maktab hovlisida qo‘shimcha bino qurib, yoshlarni ishli qilishga uringan tadbirkorning noqonuniy qurilishi buzib tashlanishi mumkin

Andijon viloyatining Baliqchi tumanida yashovchi tadbirkor Xayrullo Tojiqulov “Daryo”ga murojaat qilib, 2020-yil tuman hokimligi tomonidan berilgan hududdagi 25-umumtaʼlim maktabining 4 sotix yeriga qo‘shimcha bino qurganini, bino foydalanishga topshirilganidan ikki yil o‘tib, noqonuniy deb topilayotganini, qurilishga sarflagan mablag‘iga kuyib qolishi mumkinligini aytmoqda. “Daryo” muxbiri murojaatini o‘rganish maqsadida Baliqchi tumanida bo‘ldi.

Aniqlanishicha, viloyat Xalq taʼlimi boshqarmasi tadbirkor maktab hovlisida qurgan binoni buzdirishni so‘rab, sudga daʼvo ariza ham kiritgan.

Tadbirkor Xayrullo Tojiqulovning aytishicha, ushbu yer unga tadbirkorlikni rivojlantirish maqsadida, keyinchalik hokim qarorini chiqartirib berish sharti bilan berilgan.

“2020-yili tuman hokimi tomonidan bizga ishsizlarni ishli qilish, tadbirkorlikni rivojlantirish maqsadida 25-maktabdan 0,4 sotix joy berilgan. Bu yerga bookkafe, kichik o‘quv markazi, kanstovar, sartaroshxona qurganmiz. O‘shanda tuman hokimi ikki oyda qaror chiqarib beraman degandi. Shu sabab qurilishni boshlaganman. Lekin haligacha menga qaror berilgani yo‘q. Bu joydagi qurilishimni bitkazdim. Qisqa muddat ichida ish o‘rni yaratib qo‘ydim. Hozirda sartaroshxonaning o‘zida uch nafar, savdo do‘konimizda esa qo‘shimcha uch nafar ishchi ishlayapti”, — deydi tadbirkor.

Tadbirkorning qayd etishicha, sobiq Xalq taʼlimi vazirligi hozirda Maktabgacha va maktab ta’limi vaziri o‘rinbosari sifatida faoliyat yuritib kelayotgan Temurbek Komilov maktab hovlisidagi bino qurilishiga rozi bo‘lgan. Vazirlikning bo‘lim boshlig‘i Izzatilo Nabiyev esa tadbirkordan maktab uchun 80 million so‘mlik moddiy yordam berishini talab qilgan. Bu bo‘yicha uch tomonlama kelishuv ham imzolangan.

“2021-yilning avgust oyida sobiq Xalq taʼlimi vazirligidagi Temurbek Qalandarovich kelib, joyni ko‘rdi. Keyin “maktab o‘quvchilari bop joy ekan. Biz rozimiz, shu qarorni hal qilib, uch kunda chiqarib beramiz”, dedi. 2022-yilning fevral oyida esa Xalq taʼlimi vazirligining xalq taʼlimi muassasalari mulkidan samarali foydalanishni muvofiqlashtirish bo‘limi boshlig‘i Izzatillo Nabiyev degan inson keldi. U kelib “Siz maktab hududida joylashib olibsiz. Mayli endi joylashganiz yaxshi. Endi bizga 80 million so‘mlik moddiy yordam berasiz”, dedi. Qanday yordam deganimda maktabning kirish qismlarini asfalt qilish va qanaqadir yordam kerak bo‘lsa, qilib berishimni aytdi. “Shularning evaziga Sizga ruxsat olib beramiz” deb men bilan bitim tuzdi. Bitimga ilojsiz rozi bo‘ldim. Chunki bu yerga anchagina chiqim qilib qo‘ygandim. Bu bo‘yicha yozma ravishda, maktab direktori bilan birgalikda kelishuv tuzilgan. Hozirga kelib, o‘zlari qonuniy qilib beramiz deganlar, endi noqonuniy ravishda kirib olibsan deyapti. Vaholanki, bu yerni qurishdan oldin kadastr rahbari Bobur akani olib kelganman. O‘zi o‘lchab, o‘zi bo‘lib bergan. Xalq taʼlimi mudiri Nazokat Maqsudovnaning ham rozilik xati bor. Mana qo‘limdagi hujjatlar tasdig‘i. Tuman hokimining ham bu narsadan xabari bor”, — deydi tadbirkor.

Tadbirkor qurishlarning umumiy qiymati 1 milliard so‘mga baholanganini, ayni kunga qadar qurilishlarga o‘z mablag‘idan 500 million so‘m miqdorida pul sarf qilganini aytmoqda.

“Bu yerga o‘z mablag‘imdan sarflaganman. Loyiha 1 milliard so‘mga baholangan. 500 million so‘mini hokimiyat kredit tarzida olib berilishini aytgandi. Yarmini esa o‘z yonimdan sarflaydigan bo‘lganman. Qo‘limdan kelganicha qildim. Lekin haligacha kredit ajratib berilgani yo‘q. Agar muamollar hal bo‘lib, bino to‘liq bitsa nafaqat maktab o‘quvchilari, balki hududdagi yoshlar uchun ham ancha foydali bo‘lishiga ishonaman. Ammo hozir bu qurilishni bitiradigan mablag‘im yo‘q. Rahbarlar qurib, bitkazavering degani uchun qurganman. Agarda bular avvalroq o‘sha paytda, yaʼni 2020-yilda bu noqonuniy deyishganida men qurmasdim. Shuncha muammolarga uchramasdim. Avvaliga ishontirganlar bir aylanib, o‘zboshimchalik bilan kirib olgansiz degan gaplar bilan meni sudga berishyapti. Buni bitkazaman deb uydagi mol-qo‘yim ham qolmadi, minib yurgan mashinamni ham sotdim. Shuni bitirsam, kredit olib o‘rnini qoplab olaman, deb o‘ylaganman. Gapirsam gap ko‘p”, — deydi u.

Tadbirkor hokimlik qaror chiqarib bermasa ham binoni buzdirmasdan davlat-sherikchilik yoki yerni ijaraga berish asosida ham ishlashga tayyorligini aytmoqda.

“Bir narsani tushunmayapman, buni buzdirishdan kimga foyda? Xususiy mulk qilib bermoqchi bo‘lmasa davlat-xususiy sherikchilik asosida ishlashga ruxsat berishsin. Qandaydir yo‘llari bor-ku, axir. Agar binoni bitkazib, loyihalarni to‘liq amalga oshiradigan bo‘lsam qishlog‘imizdagi o‘quvchilar 50-100 ming so‘m yo‘l kira sarflamasdan shu yerda o‘qishga tayyorgarlik ko‘rishadi, qizlarimiz chevarchilikni o‘rganishadi, bolalar sartaroshlik hunarini egallashi mumkin. Umrini behuda o‘tkazmaydi”, — deydi Xayrullo Tojiqulov.

Baliqchi tumani hokimining investitsiyalar va tashqi savdo masalalari bo‘yicha o‘rinbosari Saydullo Abdulhamidovning aytishicha, vazirlik tomonidan davlat-xususiy sherikchilik asosida foydalanish bo‘yicha rozilik xati berilgan. Mulozim ushbu bino buzilmasligi bo‘yicha kafolat berishini aytgan.

“O‘sha paytda hokimlikda bosh mutaxassis vazifasida ishlaganman. Shu sababli 25-maktabdagi holatdan xabardorman. Tojiqulov Xayrullo akaga bu hudud qizining nomiga yoshlar, xotin-qizlarning bandligini taʼminlash maqsadida berilgan, niyatimiz yaxshi bo‘lgan. Tadbirkor tomonidan qurilish ishlari olib borilgan, haqiqatdan pul sarflangan. Bugungi kunda tadbirkorga yordam berilib, imtiyozli kredit ajratish rejalashtirilgan. Tadbirkor yaqin orada bu yerda 15 ta ish o‘rni yaratilishini kafolatlamoqda. Hududda tikuvchilik sexi, umumiy ovqatlanish shaxobchasi tashkil qilish bo‘yicha amaliy ishlar olib borilgan. Biz tomonimizdan tadbirkor tomonidan qurilgan bino-inshootlarni xususiylashtirish bo‘yicha 2021-yil 1-mayda hukumat komissiyasi raisi Sardor Umrzoqovning tashrif protokoli bayonnnomasiga kiritilgan.

Ushbu bayonnomada sobiq Xalq taʼlimi vazirligiga topshiriq yuborilgan. Sobiq vazirlik mutasaddi tashkilot vakillaridan iborat ishchi guruh bilan holatni o‘rgangan. O‘shanda tadbirkor bilan kelishuv imzolanib, vazirlikka taqdim etilgan. Vazirlikdan dastlab, davlat-xususiy sherikchilik asosida foydalanish bo‘yicha rozilik xati berilgan, xususiylashtirish bo‘yicha berilmagan. 2022-yilning 18-noyabrida Prezident administratsiyasi rahbari topshirig‘iga asosan maktab yerlaridan noqonuniy foydalanish holatlari bo‘yicha xatlov o‘tkazilgan. Shularni inobatga olib qurilish yakuniga yetgani sababli vazirlikka yana murojaat qildik. Murojaatimizni 15 ish kunida o‘rganib, hududga masʼullarni jo‘natib, tegishli xulosalar taqdim qilishi bo‘yicha ko‘rsatmalar berildi. Ushbu jarayonda shaxsan o‘zim qatnashib, hal etaman”, — deydi Saydullo Abdulhamidov.

“Daryo” muxbiri Maktabgacha va maktab taʼlimi vazirligi masʼullari bilan bog‘lanishga harakat qildi, ammo buning imkoni bo‘lmadi.

“Daryo” voqealar rivojini kuzatishda davom etadi.