Namanganda Telegram orqali ekstremistik g‘oyalarni targ‘ib qilgan shaxsga jinoyat ishi qo‘zg‘atildi 

Namanganda Telegram’da guruh ochib, ekstremistik g‘oyalarni targ‘ib qilgan shaxsga jinoyat ishi qo‘zg‘atildi. Bu haqda O‘zA xabar berdi.

Ma’lum qilinishicha, 1991-yilda tug‘ilgan S.M. ijtimoiy tarmoqlar orqali destruktiv kuchlar ta’siriga tushib qolgan va natijada Telegram’da virtual guruh tashkil qilgan. Guruhga Namangan shahrida yashovchi, 1986—1995-yillar oralig‘ida tug‘ilgan 9 nafar shaxs a’zo bo‘lgan.

S.M. guruhga terroristik va ekstremistik tashkilotlarning g‘oyaviy rahnamolari bo‘lgan Sodiq Samarqandiy, Abdulloh Zufar, Abdulloh Buxoriy, Mahmud Abdulmo‘min, Abu Salohlarning hijrat va jihod to‘g‘risidagi ma’ruzalarini joylab, guruh a’zolarini Suriyadagi “Tavhid va jihod katibasi” terroristik tashkiloti safiga qo‘shilishga da’vat qilgan.

DXX Namangan viloyati bo‘yicha boshqarmasi xodimlarining viloyat IIB bilan hamkorlikda olib borgan tezkor-qidiruv tadbirlari natijasida uning noqonuniy faoliyatiga chek qo‘yildi.

Hozirda holat yuzasidan S.M.ga nisbatan Jinoyat kodeksining 244-1-moddasi 3-qismi “g” bandi bilan jinoyat ishi qo‘zg‘atilgan.

Shuningdek, guruh a’zolarining xatti-harakatlariga nisbatan ham tergovga qadar tekshiruv ishlari olib borilmoqda.