Соғлиқни сақлаш вазири Амрилло Иноятовнинг “Беморга меҳр билан ёндошсангиз, рози бўлиб, ўзи сизга бериб кетади” мазмунидаги фикрига Коррупцияга қарши курашиш агентлиги Жамоатчилик кенгаши муносабат билдирди.
Қайд этилишича, соғлиқни сақлаш тизимида коррупцияни камайтириш Соғлиқни сақлаш вазирлиги, Коррупцияга қарши курашиш агентлиги, кенг жамоатчиликнинг, хусусан, агентлик ҳузуридаги жамоатчилик кенгашининг кун тартибидаги асосий масалалардан бири бўлиб турибди.
Шу боисдан 25 январь куни масъул тузилмалар ҳамда агентлик ҳузуридаги жамоатчилик кенгаши, ОАВ вакиллари иштирокида мулоқот ташкил этилиб, коррупцияни бартараф этишга қаратилган аниқ чоралар белгилаб олинди. Жамоатчилик кенгаши Соғлиқни сақлаш вазирлиги раҳбариятининг коррупциянинг олдини олиш бўйича бошлаган ишларини қўллаб-қувватлаган.
Шу билан бирга, шарафли касб эгалари – шифокорларни рағбатлантириш йўлларидан бири сифатида беморлар берган маблағнинг эътироф этилишини қонунчиликка ва мамлакатда олиб борилаётган коррупцияга қарши курашиш сиёсатига зид ҳаракат сифатида қайд этган. Мазкур таклиф тизимда коррупциявий жиноятлар сонининг ортишига ҳамда шифокор касби мавқеининг пасайишига, соғлиқни сақлаш тизимига халқнинг ишончи камайишига сабаб бўлиши мумкин.
Коррупцияга қарши курашиш агентлиги, Соғлиқни сақлаш вазирлиги ва Давлат хизматини ривожлантириш агентлигининг қўшма баёнотида “Тиббиёт ходимларига муносиб меҳнат шароитини яратиш ва даромадини ошириш, шунингдек, уларнинг ижтимоий ҳимоясини кучайтириш бўйича амалий чоралар кўриш, бунда, тиббиёт ходимлари малакасига, кўрсатиладиган тиббий хизмат ҳажми, мураккаблик даражаси ва сифатига қараб меҳнатга ҳақ тўлашнинг тоифаланган замонавий механизмларини жорий этиш” белгиланган.
Жамоатчилик кенгаши шифокорларни рағбатлантиришда беморлардан пул олиш сингари (ихтиёрий ёки ихтиёрий эмаслигидан қатъий назар) ноқонуний хатти-ҳаракатларни бартараф этиш ҳамда ҳақ тўлашнинг тоифаланган механизмини жорий этиш Соғлиқни сақлаш вазирлигининг асосий мақсади бўлиши лозимлигини билдирган. Шунингдек, ушбу масала устидан жамоатчилик назорати ўрнатилиши маълум қилинган.
Telegramъдаги “Сафар” каналининг ёзишича, бу масалада муаммо Соғлиқни сақлаш вазирида эмас. Муаллиф Иноятовнинг шифокорларнинг ойлиги ва одамлар пул бериши ҳақидаги сўзлари нега бунчалик муҳокама қилинаётганига ҳайрон бўлганини билдирган.
“Бу гапларнинг нимаси янгилик? Қайси даврда шунақа бўлмаган? Ким дўхтирнинг чўнтагига Иноятовнинг ибораси билан айтганда, “сўрамаса ҳам, рози бўлиб, баракасини бериб” кетмаган? Шифокорнинг чўнтагига солинаётган пул нима деб аталиши ва бу гапни ким айтаётганидан қатъи назар, бу ҳолат бор. Буни ҳаммамиз биламиз. Кеча ҳам бор эди, эртага ҳам бўлади. Шу гапни вазир айтгани учун у айбдор бўлиб қолмайди. Чунки муаммо аслида унда эмас, йилларки ўнгланмаётган тизимда. Тизимни тўғрилаш учун эса вақт керак. Ҳақиқат шуки, чўнтагида пули бор дўхтирнинг ишиям сифатли бўлади. Вазир айтган зўр дўхтирлар, “ўз брендини яратган” шифокорлар ҳозир ҳам яхши яшашяпти. Одамлар дўхтирларнинг чўнтагига пул солишига қарши курашишдан кўра, сифатли тиббиёт ҳақида гаплашсак бўларди. Сифатли нарса эса ҳар доим қиммат бўлади. Майли, бу алоҳида мавзу”, — дейилади постда.
Соғлиқни сақлаш вазири Амрилло Иноятов Фарғонада тиббиёт соҳаси вакиллари ва журналист билан учрашув ўтказганди. Иноятов соғлиқни сақлаш тизимидаги раҳбар ходимларнинг маоши ҳақида гапириб, раҳбар-шифокорлардан биридан ойлиги қанчалигини сўраган. Вазир шифокорнинг гапини эшитиб, у айтган 5,5 миллион сўм ойлиги ва унга қўшимча беморлар берадиган ҳақни қўшганда етарлича сумма чиқишига ишонч билдирган.
Изоҳ (3)
Хамма айибни вазирга юклашдан олдин ойлик маош тарифларини кайта куриб чикишни маслахат бераман. Олий тойфали хамшира Энди тугатиб келган шифокордан куп маош олади.
Xa vazir aytgan gap togri bu ishlar bolayotgandir lekin bu gaplariga qoshilish degani karrupsiyani qonunilashtirishkuu shunda shifokor pul berganga yaxshi momilada bolib bermaganga yuzaki baxo berishni tashxislarni chuqur organmay yuzaki qarashga otadi yana osha tabaqalanish shakillanadi. Xamma xam inson shifokor xam nafsi borr puli yoq odammga shifokorr BRENDI shakillangan bolsa xam pul berolmaydi chunki unda yoq pul duo qiladi chin kongildan, shifokor puli yoq bemorga bermagandan keyin albatta unga vaqt ajratmydi tabaqalaydi. Tizimni buzulishiga olib keladi buuu.
shifokorlarni rag‘batlantirish yo‘llaridan biri sifatida bemorlar bergan mablag‘ning e’tirof etilishini qonunchilikka va mamlakatda olib borilayotgan korrupsiyaga qarshi kurashish siyosatiga zid harakat sifatida baholayman.
Jizzax shaxrida yaqinda farzandli bo‘ldik. SHifokor chekka xonaga chaqirib pul talab qildi. Ma'lum miqforda suyunchi puli berdim Hamma berar ekan. Keyin bilsam kam bergan ekanman shekilli, vrach xam, xamshira xam biror marta xam ona va boladan xabar olmapdi. So‘rasam siz kam pul bergan ekansis dadasi, shuning uchun xech kim xabar olmadi. Ko‘proq pul berganlardan, doimiy xabar olib turdi deb aytdi.
Juda xolatdan xafa bo‘ldim Kim ko‘proq pul bersa shunga yaxshi qarar ekan. Kam berganga qaramas ekan.
Vazir shuni rivojlantirmoqchi shekilli.
Bu ish yaxshi emas deb o‘ylayman.