Turkiyadagi elchixonalar, cherkov va sinagogalarga terakt uyushtirishni rejalashtirgan 15 kishi hibsga olindi (video, foto)

Turkiya politsiyasi “Islom davlati” terrorchilik tashkilotiga aloqadorlikda gumon qilib, 15 kishini qo‘lga oldi. Bu haqda Anadolu xabar berdi.

Politsiya ma’lumotlariga ko‘ra, ular Shvetsiya va Niderlandiya elchixonalari, shuningdek, cherkov va sinagogalarga hujum uyushtirishni rejalashtirgan, biroq “o‘ziga xos tahdidlar” aniqlanmagan. Turkiya razvedkasi ular ISHID bo‘linmasi hisoblangan “Xuroson viloyati” terrorchilik guruhidan ko‘rsatma olganini aytmoqda.

Ayrim ommaviy axborot vositalari gumonlanuvchilar Yevropada Qur’on yoqib yuborilganiga javoban shunday harakat qilmoqchi bo‘lganini xabar qilmoqda.

Avvalroq AQSH diplomatik missiyasi Istanbuldagi elchixonalar, cherkovlar va sinagogalar yaqinida ehtimoliy teraktlar yuz berishi haqida ogohlantirgandi. Mazkur xavf fonida Yevropaning bir qancha davlatlari Istanbuldagi konsulligini yopgandi. Turkiya TIV holat yuzasidan to‘qqizta davlat elchisini chaqirtirgandi. 

Turkiya bir guruh G‘arb davlatlarini tanqid qilib, ularni “psixologik urush” olib borishda va Turkiyaning turizm sanoatini barbod qilishga urinishda aybladi.

Yevropa davlatlarida Qur’onning yoqib yuborilishi

21-yanvar kuni Rasmus Paludan Turkiyaning Stokgolmdagi elchixonasi oldida Qur’onni yoqib yubordi. Shundan keyin Turkiyada Shvetsiyaga qarshi namoyishlar boshlandi. Mamlakatning Istanbuldagi Bosh konsulligida ommaviy aksiya bo‘lib o‘tdi, unda Shvetsiya bayrog‘i yoqib yuborildi. 

23-yanvar kuni sodir bo‘lgan voqealar fonida Turkiya milliy mudofaa vaziri Hulusiy Akar Shvetsiya va Finlyandiya terrorizmga qarshi kurashda Anqaraga yordam berishni xohlamasligini bildirdi. Ayni paytda mamlakatlar NATOga kirishda Turkiyadan yordam kutmoqda.

23-yanvar Niderlandiyada “Vatanparvar yevropaliklar Gʻarbning islomlashuviga qarshi” (PEGIDA) harakati yetakchisi Edvin Vagensveld Gaagadagi Niderlandiya Vakillar palatasi binosi oldida Qur’on kitobini omma oldida yirtib, yoqib yubordi. U Rasmus Paludanni qo‘llab-quvvatlash uchun o‘tkazilganini ma’lum qildi.

27-yanvar kuni Rasmus Paludan Kopengagendagi masjid oldida ham muqaddas kitobni yoqib yubordi. Holat yuzasidan Daniya elchisi Turkiya TIVga chaqirtirildi.

30-yanvar kuni Daniyalik siyosatchi Rossiyaning Daniyadagi elchixonasi oldida yana Qur’onni yoqib yubordi. Ramzan Qodirov bunga munosabat bildirdi.