Туркиядаги элчихоналар, черков ва синагогаларга теракт уюштиришни режалаштирган 15 киши ҳибсга олинди (видео, фото)

Туркия полицияси “Ислом давлати” террорчилик ташкилотига алоқадорликда гумон қилиб, 15 кишини қўлга олди. Бу ҳақда Anadolu хабар берди.

Полиция маълумотларига кўра, улар Швеция ва Нидерландия элчихоналари, шунингдек, черков ва синагогаларга ҳужум уюштиришни режалаштирган, бироқ “ўзига хос таҳдидлар” аниқланмаган. Туркия разведкаси улар ИШИД бўлинмаси ҳисобланган “Хуросон вилояти” террорчилик гуруҳидан кўрсатма олганини айтмоқда.

Айрим оммавий ахборот воситалари гумонланувчилар Европада Қуръон ёқиб юборилганига жавобан шундай ҳаракат қилмоқчи бўлганини хабар қилмоқда.

Аввалроқ АҚШ дипломатик миссияси Истанбулдаги элчихоналар, черковлар ва синагогалар яқинида эҳтимолий терактлар юз бериши ҳақида огоҳлантирганди. Мазкур хавф фонида Европанинг бир қанча давлатлари Истанбулдаги консуллигини ёпганди. Туркия ТИВ ҳолат юзасидан тўққизта давлат элчисини чақиртирганди. 

Туркия бир гуруҳ Ғарб давлатларини танқид қилиб, уларни “психологик уруш” олиб боришда ва Туркиянинг туризм саноатини барбод қилишга уринишда айблади.

Европа давлатларида Қуръоннинг ёқиб юборилиши

21 январь куни Расмус Палудан Туркиянинг Стокгольмдаги элчихонаси олдида Қуръонни ёқиб юборди. Шундан кейин Туркияда Швецияга қарши намойишлар бошланди. Мамлакатнинг Истанбулдаги Бош консуллигида оммавий акция бўлиб ўтди, унда Швеция байроғи ёқиб юборилди. 

23 январь куни содир бўлган воқеалар фонида Туркия миллий мудофаа вазири Ҳулусий Акар Швеция ва Финляндия терроризмга қарши курашда Анқарага ёрдам беришни хоҳламаслигини билдирди. Айни пайтда мамлакатлар НАТОга киришда Туркиядан ёрдам кутмоқда.

23 январь Нидерландияда “Ватанпарвар европаликлар Ғарбнинг исломлашувига қарши” (ПЕГIDА) ҳаракати етакчиси Эдвин Вагенсвелд Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборди. У Расмус Палуданни қўллаб-қувватлаш учун ўтказилганини маълум қилди.

27 январь куни Расмус Палудан Копенгагендаги масжид олдида ҳам муқаддас китобни ёқиб юборди. Ҳолат юзасидан Дания элчиси Туркия ТИВга чақиртирилди.

30 январь куни Даниялик сиёсатчи Россиянинг Даниядаги элчихонаси олдида яна Қуръонни ёқиб юборди. Рамзан Қодиров бунга муносабат билдирди.