Niderlandiyada faol Shvetsiyadagi aksiyani qo‘llab-quvvatlash uchun Qur’onni yirtib tashladi

Niderlandiyada “Vatanparvar yevropaliklar G‘arbning islomlashuviga qarshi” (PEGIDA) harakati yetakchisi Edvin Vagensveld 23-yanvar kuni Gaagadagi Niderlandiya Vakillar palatasi binosi oldida Qur’on kitobini omma oldida yirtib, yoqib yubordi. Bu haqda ADR News xabar bermoqda.

Aksiya 21-yanvar kuni Turkiyaning Stokgolmdagi elchixonasi oldida Qur’onni yoqib yuborganidan keyin jamoatchilik tanqidiga uchragan daniyalik siyosatchi Rasmus Paludanni qo‘llab-quvvatlash uchun o‘tkazilgan. 

Turk OAVlarining xabar berishicha, Vagensveld avval ham ikki marta xuddi shunday qilgan va har safar hibsga olingan, ammo bu safar politsiya uning aksiyasiga aralashmagan.

21-yanvar kuni Turkiyaning Stokgolmdagi elchixonasi yonida norozilik mitingi bo‘lib o‘tgandi: aksiya ishtirokchilari Turkiyada taqiqlangan Kurdiston ishchilar partiyasini (KIP) qo‘llab-quvvatlagan va Shvetsiyaning NATOga kirishiga qarshi chiqqan. Namoyish tashkilotchisi, o‘ta o‘ngchi siyosatchi, Stram Kurs partiyasi rahbari Rasmus Paludan mitingda islomni qoralovchi nutq so‘zlagan, so‘ngra yumshoq muqovali Qur’onni yoqib yuborgan.

Shvetsiya politsiyasi mitingga so‘z erkinligi to‘g‘risidagi qonunlarga muvofiq ruxsat berilganini tushuntirdi.

Paludanning xatti-harakatlari birinchi navbatda Turkiyada va boshqa islomiy mamlakatlarda — masalan, Saudiya Arabistoni, Iordaniya, Birlashgan Arab Amirliklari va Kuvaytda norozilikni keltirib chiqardi. Eron Tashqi ishlar vazirligi matbuot kotibi Nosir Kanani buni islomofobiyaning ko‘rinishi deb atadi.

O‘z navbatida, Shvetsiya hukumati a’zolari ham Qur’onning yoqilishini qoralab chiqdi. Turkiya prezidenti Rajab Toyyib Erdo‘g‘on voqeaga munosabat bildirib, Shvetsiya endi NATOga a’zolikda qo‘llab-quvvatlanmasligini aytdi.