Pokiston rasmiylari “kufrona” kontentni olib tashlash talablarini bajarmagani uchun Wikipedia veb-ensiklopediyasini blokladi. Bu haqda Bloomberg xabar berdi.
Ma’lum qilinishicha, Wikipedia kompaniyasiga ushbu ma’lumotlarni o‘chirish uchun 48 soat vaqt berilgan edi.
“Pokiston kufrona kontentlarni olib tashlamagani uchun Wikipedia’ni blokladi”, — deyiladi xabarda.
Na nashr, na Pokiston rasmiylari qaysi “kufrona” kontentni nazarda tutgani haqida ma’lumot berilmagan. Biroq Pokiston telekommunikatsiya boshqarmasi mazkur kontent olib tashlansa, Wikipediani blokdan chiqarish masalasini ko‘rib chiqishga va’da bergan. Pokiston qonunlarida kufrga nisbatan o‘lim jazosi tayinlanadi.
Avvalroq “Roskomnadzor” Wikipedia onlayn-ensiklopediya ma’muriyatidan Rossiya Bosh prokuratura tomonidan Ukrainadagi urushga oid “ishonchsiz ma’lumotlar” deya topilgan materiallarni o‘chirib tashlashni talab qilgandi.
Ma’lumot o‘rnida, ko‘p tilli onlayn ensiklopediya — Vikipediya 10 yil ichida birinchi marta platforma dizaynini o‘zgartirdi. Asosiy o‘zgarishlar — qidiruvni soddalashtiradigan mundarijaning yangi versiyasi va ensiklopediyaning tilni almashtirish vositalarining yangilanishi.
Vikipediya bu — onlayn ensiklopediya bo‘lib, unda barcha internet foydalanuvchilari maqolalar yaratish va tahrirlash imkoniyatiga ega.
Hozirgi vaqtda u o‘xshash ensiklopediyalar orasida qamrovi va maqolalar soni bo‘yicha eng katta bo‘lib, 306 til bo‘limini o‘z ichiga oladi.
Izoh (0)