Yevropaning qator davlatlari Istanbuldagi konsulligini yopdi. Turkiya to‘qqizta davlat elchisini TIVga chaqirtirdi

Turkiya Istanbuldagi qator Yevropa konsulliklari vaqtincha yopilganidan so‘ng to‘qqizta davlat elchilarini TIVga chaqirtirdi. Bu haqda Deutsche Welle xabar berdi.

Ma’lum qilinishicha, Germaniya, Belgiya, Buyuk Britaniya, Fransiya, Italiya, Niderlandiya, Shveytsariya, Shvesiya va AQSH elchilari Turkiya Tashqi ishlar vazirligida yig‘ilishga chaqirilgan. Germaniya 1-fevral kuni Yevropaning ayrim davlatlarida Qur’on yoqib yuborilgan voqealardan so‘ng teraktlar xavfi kuchayganini aytib, Istanbuldagi konsulligini yopgan. Kamida oltita davlat ehtiyot chorasi sifatida xuddi shunday qadam tashlagan.

AQSH konsulligi ochiqligicha qolmoqda, chunki majmua Istanbul markazida joylashgan. Biroq, Vashington boshqa bir qator mamlakatlar hukumatlariga qo‘shilgan va fuqarolariga hushyor bo‘lishni va sayyohlik nuqtalaridan qochishni maslahat beruvchi ogohlantirish chiqargan.

Turkiya bir guruh G‘arb davlatlarini tanqid qilib, ularni “psixologik urush” olib borishda va Turkiyaning turizm sanoatini barbod qilishga urinishda aybladi.

Turkiya hukumati ham o‘z fuqarolarini Yevropa va AQSHga safar qilishning ehtimoliy xavfidan ogohlantirgan. Turkiya Tashqi ishlar vazirligi Yevropadagi fuqarolarini namoyishlar oʻtayotgan hududlardan nari yurishga chaqirgan. Mamlakat so‘nggi paytlarda musulmonlar va turklarga qarshi avj olgan norozilik qit’ada “diniy murosasizlik va nafratning xavfli darajasini” ko‘rsatayotganini ta’kidlagan.