Daniyalik siyosatchi Rossiyaning Daniyadagi elchixonasi oldida yana Qur’onni yoqib yubordi. Ramzan Qodirov bunga munosabat bildirdi
Daniyalik siyosatchi, o‘ng qanot Stram Kurs (Qattiq kurs) partiyasi asoschisi Rasmus Paludan bu safar Rossiyaning Daniyadagi elchixonasi oldida Qur’onni yoqib yubordi.
U o‘zining Instagram sahifasida muqaddas kitob yoqib yuborilgan videoni joylashtirdi. U bu safargi “aksiya” asli chechen bo‘lgan shved UFC jangchisi Hamzat Chimayev, shuningdek, Checheniston rahbari Ramzan Qodirovga bag‘ishlanishini aytdi.
“Hamzat Chimayev meni haqorat qilgani achinarli. Shuning uchun men uning sharafiga kitobni Rossiyaning Daniyadagi elchixonasi oldida yoqishga qaror qildim. Hamzat Ramzan Qodirovdek bezorilik qilishda davom etadimi? Men ularga o‘zini to‘g‘ri tutishga o‘rgatishim kerakmi?” — deb yozgan radikal.
Eslatib o‘tamiz, Turkiyaning Shvetsiyadagi elchixonasida Qur’on birinchi marta yoqib yuborilganidan keyin Qodirov Paludanni “jahannam mahsuli”, shuningdek, “iblis” deb atagan. Chimayev esa Paludan terrorchi ekanini ta’kidlagan.
Rossiya elchixonasi oldida Qur’on yoqib yuborilganidan keyin Ramzan Qodirov daniyalik siyosatchini kechirmasligini aytdi.
“Daniyalik bu safargi muqaddas kitobni yoqib yuborishini menga ‘bag‘ishladi’. Menga nisbatan ko‘plab murojaatni kechirishim mumkin, lekin dunyodagi bir yarim milliard musulmon kabi diniy terrorchining bu harakatini kechirmayman. Ha, men uchun bunday provokatorlar haqiqiy terrorchilar bo‘lib, ulardan sog‘lom jamiyatni tozalishimiz kerak”, — dedi u.
Yevropa davlatlarida Qur’onning yoqib yuborilishi
21-yanvar kuni Rasmus Paludan Turkiyaning Stokgolmdagi elchixonasi oldida Qur’onni yoqib yubordi. Shundan keyin Turkiyada Shvetsiyaga qarshi namoyishlar boshlandi. Mamlakatning Istanbuldagi Bosh konsulligida ommaviy aksiya bo‘lib o‘tdi, unda Shvetsiya bayrog‘i yoqib yuborildi.
23-yanvar kuni sodir bo‘lgan voqealar fonida Turkiya milliy mudofaa vaziri Hulusiy Akar Shvetsiya va Finlyandiya terrorizmga qarshi kurashda Anqaraga yordam berishni xohlamasligini bildirdi. Ayni paytda mamlakatlar NATOga kirishda Turkiyadan yordam kutmoqda.
23-yanvar Niderlandiyada “Vatanparvar yevropaliklar Gʻarbning islomlashuviga qarshi” (PEGIDA) harakati yetakchisi Edvin Vagensveld Gaagadagi Niderlandiya Vakillar palatasi binosi oldida Qur’on kitobini omma oldida yirtib, yoqib yubordi. U Rasmus Paludanni qo‘llab-quvvatlash uchun o‘tkazilganini ma’lum qildi.
27-yanvar kuni Rasmus Paludan Kopengagendagi masjid oldida ham muqaddas kitobni yoqib yubordi. Holat yuzasidan Daniya elchisi Turkiya TIVga chaqirtirildi.
Mavzuga doir:
- Erdo‘g‘on Shvetsiyada Qur’onning yoqib yuborilishiga munosabat bildirdi
- Eron oliy rahnamosi Yevropa davlatlarida Qur’onning yoqib yuborilishiga munosabat bildirdi
