Eron oliy rahnamosi Oyatulloh Ali Xomanaiy o‘n minglab mahbuslarni, jumladan, namoyish ishtirokchilarini afv etdi. Bu haqda IRNA xabar berdi.
Ma’lum qilinishicha, amnistiya Islom inqilobi g‘alabasining 44 yilligi va Rajab oyi sharafiga o‘tkazilgan.
“Xomanaiy sud hokimiyati rahbari Gʻulom-Husayn Mohseni-Ejeining mamlakatdagi so‘nggi voqealar jarayonida hibsga olingan o‘n minglab ayblanuvchilarni afv etish yoki jazo muddatini qisqartirish taklifiga rozi bo‘ldi”, — deyiladi xabarda.
Qayd etilishicha, xorijliklar foydasiga josuslik qilganlikda ayblangan, qotillik sodir etgan yoki jamoat binolarini vayron qilish va ularga o‘t qo‘yishda ishtirok etgan shaxslar amnistiyaga tushmaydi.
2022-yil sentabr oyi o‘rtalaridan beri hijobni noto‘g‘ri o‘ragani uchun politsiya tomonidan hibsga olingan 22 yoshli Mahsa Aminiy o‘limi ortidan Eronda ommaviy tartibsizliklar boshlangandi. Aholi qizning o‘limida politsiyani ayblagan. Mamlakatda bir qancha namoyishchi qatl qilingan.
Mavzuga doir:
Izoh (0)