Meta компаниясининг Facebook ва Instagram ижтимоий тармоқлари АҚШ собиқ президенти Дональд Трампнинг аккаунтларини блокдан чиқармоқчи. Бу ҳақда компания баёнотига таяниб, “РБК” хабар берди.
“Яқин ҳафталарда жаноб Трампнинг Facebook ва Instagram’даги аккаунтларини блокдан чиқарамиз”, — дейилади баёнотда.
Агар ушбу тармоқларда тақиқланган контент чоп этилса, у олиб ташланади, Трамп эса қоидабузарлик даражасига қараб бир ойдан икки йилгача муддатга яна блокланади.
Meta Америка собиқ раҳбарининг аккаунтларини 2021 йилнинг ёзида блоклаганди, бунга Трамп тарафдорларининг Капитолий биносига бостириб киргани сабаб бўлди. Трамп ижтимоий тармоқни цензурада айблади.
Маълумот учун 2021 йил 6 январь куни АҚШ Конгресси аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда Трампнинг тарафдорлари Конгрессга бостириб кирган. Полиция бир неча соат ўтибгина намойишчиларни Капитолийдан ҳайдаб чиқаришга муваффақ бўлган. Ҳуқуқ-тартибот органлари ходимлари ўқотар қурол, дубинка, кўздан ёш оқизувчи газдан фойдаланган. Ҳодисада Капитолий хавфсизлик ходими билан биргаликда, беш киши ҳалок бўлган, 140 нафар полициячи яраланган.
Ҳужум олдидан Трамп 2020 йилги сайлов натижаларини тан олишдан очиқчасига бош тортган ва овоз бериш жараёнида кўплаб қонунбузарликларга йўл қўйилганини таъкидлаб, сайлов натижаларини қайта кўриб чиқишни талаб қилганди.
Кейинроқ Трампнинг ўзи Капитолийга ҳужумни қоралаб чиқди.
2022 йилнинг декабрь ойида АҚШ Конгресси Вакиллар палатасининг Капитолийга ҳужумни тергов қилиш бўйича сайловчи қўмитаси Дональд Трампга нисбатан жиноий иш қўзғатишни тавсия қилди.
Трампнинг таъкидлашича, демократлар унинг 2024 йилда президентликка номзодини қўйишига тўсқинлик қилмоқчи. Ноябрь ойи ўрталарида у президентлик сайловларида қатнашиш нияти борлигини маълум қилганди.
Изоҳ (0)