“Daryo” nashri 25-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Ukrainaning qo'shib olingan hududlarida axloq tuzatish koloniyalarini quradi. U yerga ukrainalik asirlar joylashtiriladimi?
Rossiya Federal Jazoni ijro etish xizmatiga (FSIN) urush boshlanganidan keyin qo‘shib olingan Ukraina hududlarida 24 ta axloq tuzatish koloniyalarini yaratish vazifasi topshirildi. Bu haqda Rossiya hukumatining tegishli farmoyishida aytilgan.
O‘zini o‘zi respublika deb e’lon qilgan Donetsk xalq respublikasida 12 ta, Lugansk xalq respublikasida yettita, Xerson viloyatining Rossiyaga qo‘shib olingan qismida uchta, Zaporojye viloyatining qo‘shib olingan qismida esa ikkita axloq tuzatish koloniyasi (va bitta koloniya-turar joy) tashkil etish rejalashtirilgan.
Bundan tashqari, Rossiya hukumati rejasiga ko‘ra, bu hududlarda uchta davolash tuzatish muassasasi va uchta axloq tuzatish markazi ham tashkil etiladi.
2022-yil noyabr oyida Aleksey Navalniy jamoasining “Siren” nashri Ukrainaning Xerson viloyatidan chekinish paytida rossiyalik harbiylar ukrainalik asirlarni Rossiya hududidagi 10 ta koloniyaga olib ketgani haqida xabar bergandi.
Turkiya NATOdan chiqadimi? Bugun mana shu masala ochiqlandi
Anqara Shimoliy Atlantika alyansi (NATO)dan chiqish ehtimolini ko‘rib chiqmayapti. Bu haqda Turkiya prezidenti Rajab Toyyib Erdo‘g‘on raisligidagi Adolat va taraqqiyot partiyasi matbuot kotibi O‘mer Chelik 25-yanvar kuni ma’lum qildi.
“Har saylovda bunday holatlarga (Turkiyani NATOdan chiqarish chaqiriqlariga — “Daryo” izohi) duch kelamiz. Bular bizni xavotirga soladigan narsalar emas. Turkiyani NATOdan chiqarish kerakligi haqida gapirayotganlarning so‘zlarida asos yo‘q. Bu haqda gap bo‘lishi ham mumkinmas. Biz NATOga asos solgan davlatlardan birimiz. Ular bu haqda gapirishga haqli emas”, — dedi Chelik CNN Turk telekanaliga bergan intervyusida.
25-yanvar kuni ertalab Turkiyaning “Vatan” partiyasi raisi o‘rinbosari Ethem Sanjak Turkiya Anqaraga qarshi provokatsion harakatlar tufayli 5—6 oy ichida NATOni tark etishi mumkinligini aytgandi. Uning soʻzlariga koʻra, soʻnggi soʻrovlar Turkiya aholisining kamida 80 foizi “AQSH Turkiyaga nisbatan eng dushmanona va buzgʻunchi siyosat olib borayotgan davlat” ekaniga ishonch bildirgan. Siyosatchi “so‘nggi paytlarda turk xalqi Rossiya va Vladimir Putinga hamdard bo‘la boshlaganini” ta’kidladi.
Vladimir Zelenskiy Jinoyat kodeksiga tuzatishlar kiritishni ma’qulladi. Huquq himoyachilari nima sababdan ushbu qonun loyihasidan norozi?
Ukraina prezidenti Vladimir Zelenskiy Jinoyat kodeksiga tuzatishlar kiritishni ma’qulladi.
Oliy Rada saytida xabar qilinishicha, 13-yanvar kuni deputatlar tomonidan qabul qilingan hujjatga prezident imzo chekkan.
Ukraina Jinoyat kodeksiga kiritilgan o‘zgartirishlarga ko‘ra, qo‘mondonga bo‘ysunmaslik, buyruqqa rioya qilmaslik, qo‘mondonga tahdid yoki zo‘ravonlik qilish, harbiy qismni va jang maydonini ruxsatsiz tashlab ketishda ayblangan harbiy xizmatchilarga sudlar jazoni qisqartirish yoki shartli jazo tayinlash huquqiga ega bo‘lmaydi. Bundan tashqari, ma’muriy huquqbuzarliklar, masalan, harbiylarning spirtli ichimlik ichishi uchun jazo muddati oshiriladi.
Ushbu qonun loyihasi hali qabul qilinmasdan turib huquq himoyachilari tomonidan tanqidga uchragandi, u harbiylarning asosiy huquqlari sud tomonidan himoyalanishini sezilarli darajada cheklaydi, deb hisoblanmoqda. O‘zgartirishlarga qarshi petitsiya bir kunda 25 000 dan ortiq ovoz olgan, bu esa uni qayta ko‘rib chiqishga majbur qiladi.
O‘zbekistonda vazirlik va idoralar aniq belgilangan 16 ta yo‘nalishda ishlaydi, endilikda tashkilot xodimlarining umumiy cheklangan soni ham belgilandi
O‘zbekistonda har bir vazirlik va idora o‘z faoliyatini tizim tashkillashtirish maqsadida 16 ta yo‘nalish bo‘yicha takliflarni o‘z ichiga olgan prezident hujjati loyihasini kiritadi.
Hujjat loyihasida: fuqarolarning tizimli muammolarini hal etish, budjet mablag‘laridan to’g‘ri foydalanish, davlat xaridlari shaffofligini oshirish, shuningdek, tadbirkorlik subyektlari uchun teng imkoniyatlar yaratish orqali davlat xaridlari jarayonida raqobatni rivojlantirish;
- 2023-yildan boshlab vazirlik va idoralarining ayrim funksiyalarini bosqichma-bosqich xususiy sektorga oʻtkazish;
- tadbirkorlik faoliyatini rivojlantirish hamda aholini ijtimoiy qoʻllab-quvvatlash tizimini takomillashtirish;
- tashkilotlar kesimida korrupsion holatlar bilan kurashish
- ish jarayonini raqamlashtirish va qayta tiklanuvchi energiya manbalarini keng jalb qilish amaliyotlari kiritildi.
Shuningdek prezident farmoni bilan vazirlik va idoralarda xodimlarning umumiy cheklangan soni belgilandi.
Farmonga muvofiq, vazirlik va idoralarning nobudjet mablagʻlaridan qoʻshimcha boshqaruv shtatlarni kiritish qatʼiy taqiqlanmoqda.
Ayni paytda hukumatga boʻysunadigan mustaqil vazirlik va idoralar soni jami 26 ta etib belgilanmoqda (ular tarkibiga kirgan barcha qoʻmitalar, agentliklar va inspeksiyalar bilan birga jami 69 ta) shu jumladan:
- vazirliklar — 21 ta;
- qoʻmitalar — 12 ta, shundan 2 tasi mustaqil maqomga ega;
- agentliklar — 25 ta, shundan 3 tasi mustaqil maqomga ega;
- inspeksiyalar — 11 ta.
Qolaversa, vazirlik va idoralarning markaziy apparatlari va hududiy boʻlinmalarining tuzilmalarini shakllantirish boʻyicha yagona talablar ham tasdiqlanmoqda.
Izoh (0)