Zelenskiy ofisi Rossiya bilan urushni tugatish ssenariysini ma’lum qildi
Ukraina prezidenti ofisi maslahatchisi Mixail Podolyak urushda ehtimoliy mag‘lubiyatdan so‘ng Rossiya nazoratsiz siyosiy o‘zgarishlarga duch kelishini aytib, urush tugashini prognoz qildi.
Podolyakning so‘zlariga ko‘ra, ba’zi hududlar avtonomiya imkoniyatga ega bo‘ladi.
“Ukraina Qurolli kuchlari Bosh shtabi tomonidan ishlab chiqilayotgan va Oliy Bosh qo‘mondonlik shtab-kvartirasi yig‘ilishlarida batafsil muhokama qilingan qarshi hujum doirasida Rossiya to‘rttagacha muhim mag‘lubiyatga uchraydi. Shundan keyin Rossiya armiyasidagi parchalanish va yakuniy demoralizatsiya jarayonlari orqaga qaytarilmas holga keladi”, — deydi u.
Podolyak Rossiya shaharlarida katta yo‘qotishlar tufayli ommaviy norozilik namoyishlari boshlanishi mumkinligini aytdi. Shuningdek, Rossiya prezidenti Vladimir Putin atrofida “aybdorlarni qidirish” boshlanishi, bu esa hokimiyat vertikalining zaiflashishiga olib kelishi prognoz qilingan.
Mixail Podolyak Ukraina Qurolli kuchlari 1991-yildagi Ukraina chegaralarida to‘xtashini, Rossiyada esa federatsiyaning ayrim subyektlari ajralib chiqishi mumkinligini ta’kidladi. Yadro qurollariga kelsak, Podolyakning so‘zlariga ko‘ra, ular Rossiya generallarining qolgan vakillari nazorati ostida bo‘ladi, shuning uchun ularning qora bozorga tushish xavfi minimaldir.
Rossiya muvaqqat hukumati vakillari Ukraina bilan Rossiya armiyasining harbiy jinoyatlari, Rossiyani chegara zonasida demilitarizatsiya qilish, shuningdek, tovon toʻlash boʻyicha muzokaralar olib borishi prognoz qilinmoqda. Podolyak urushni tugatish bo‘yicha bunday ssenariyni tezlashtirish uchun Ukrainaga ko‘proq qurollar kerakligini aytmoqda.
“Formula oddiy: agar siz urushni tezroq tugatishni istasangiz, Ukrainaga so‘ragandan ham ko‘proq qurol-yarog‘lar bering”, — deb xulosa qildi Zelenskiy ofisi maslahatchisi.
