AQSh Kongressiga amaldagi prezident Donald Tramp tarafdorlari tomonidan uyushtirilgan shiddatli hujum chog‘ida yarador bo‘lgan politsiyachi vafot etdi, deb yozadi Meduza.

Foto: Meduza

Kapitoliy politsiyasi tomonidan e’lon qilingan bayonotda aytilishicha, politsiya xodimi Brayan Siknik 7-yanvar kuni kechqurun hayotdan ko‘z yumgan. Trampning tarafdorlari bilan to‘qnashuvlarda jarohatlangan politsiyachi qism joylashgan joyga qaytgan va hushini yo‘qotgan. Siknik kasalxonaga yetkazilgan, ammo shifokorlar uning hayotini saqlab qola olmagan. Hodisa yuzasidan tekshiruv olib borilmoqda.

Kapitoliy politsiyasida 2008-yildan buyon xizmat qilib kelgan Siknik Vashingtonda 6-yanvar kungi tartibsizliklarda halok bo‘lgan beshinchi kishi bo‘ldi.

Tartibsizliklar tufayli Kapitoliy politsiyasi rahbari Stiven Sund iste’foga chiqishini e’lon qildi. Sundning iste’fo haqidagi bayonotini Politico nashrining parlamentdagi muxbiri Xizer Keygl o‘z Twitter’ida e’lon qildi.

U tartibsizliklardan keyin Kapitoliy politsiyasi rahbari Kongress Vakillar palatasi spikeri Nensi Pelosining talabiga qaramasdan, o‘z lavozimini tark etmasligini ma’lum qilganini eslatdi.

Kapitoliy politsiyasini 2019-yil iyunidan boshqarib kelgan Sund 16-yanvarda iste’foga chiqadi.

O‘z navbatida Tramp murojaat bilan chiqib, Kapitoliydagi tartibsizliklarni qoraladi va aybdorlar javobgarlikka tortilishiga va’da berdi.

Trampning murojaati uning Twitter’dagi akkauntida e’lon qilindi, undan 12 soatlik blokirovka olib tashlandi. Facebook va Instagram’da esa Tramp 20-yanvar — uning prezidentlik muddati tugaguniga qadar post qoldira olmaydi.

Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.

Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘ldi.

Keyinroq, 7-yanvar kuni AQSh Kongressi majlisini davom ettirib, Jo Baydenning AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi.

Kapitoliy politsiyasi Tramp tarafdorlarining Kongressga bostirib kirishiga yo‘l qo‘yib bergani uchun tanqidlarga uchradi.

Tramp ovoz berish yakunlaridan hamon norozi bo‘lsa-da, vakolatlarni saylangan prezidentga topshirishga tayyorligini e’lon qildi.