Bangladeshning Chittagong shahrida yashovchi 15 yoshli Fahim bekinmachoq o‘ynayotganda konteynerga yashirinishi ortidan Malayziyaga kelib qoldi. Bu haqda India Times xabar berdi.
![](/static/photo_2023-01-25_21-47-10.jpg)
Ma’lum qilinishicha, Fahim olti kun davomida ovqat va suvsiz yuk tashish konteynerida bo‘lgan. Malayziyaning Port Klang ishchilari 17-yanvar kuni Bangladeshdan kelgan konteynerni tushirayotganda uning ichida bola borligini aniqlagan. Ular bola o‘g‘irlab ketilgan deb o‘ylab, politsiyaga qo‘ng‘iroq qilgan. Fahim huquq-tartibot xodimlariga do‘stlari bilan bekinmachoq o‘ynayotganida yuk tashish konteyneriga yashiringanini aytgan.
O‘yin paytida u uxlab qolgan, yuk ko‘taruvchilar esa Fahimni payqamay, tasodifan konteynerni qulflagan va uni kemaga ortgan. Port ma’muriyati Fahimga tez yordam chaqirgan. U holsizlik bilan kasalxonaga yotqizilgan. Nashrning aniqlik kiritishicha, hozirda uning hayoti xavf ostida emas. Yaqin kunlarda u vataniga qaytariladi.
Izoh (0)