Марокаш Украинага Чехияда турган Т-72B танкларини тақдим этди, уларнинг 20 тага яқини аллақачон Киевга юборилган, деб хабар беради Шимолий Африканинг Menadefence портали.

Нашр Чехия бош вазири Петр Фиаланинг 9 январь кунги совет танклари модернизация қилинадиган Excalibur Army заводига ташриф буюриши билан боғлиқ фотосуратларга таянмоқда. Мақолага илова қилинган суратларда таъмирдан чиқарилаётган эски Марокаш танкларини кўриш мумкин.

Портал маълумотларига кўра, Марокаш армияси ихтиёрида 148 та Т-72, 136 та Т-72B ва 12 та Т-72BК танклари бўлган, улар 1999 ва 2000 йилларда Беларусдан тутилган ҳолатда сотиб олинган.

Портал қайд этишича, Украинага қурол-яроғ етказиб бериш ҳақидаги қарор апрель охирида Германиянинг Рамштайн ҳарбий базасида бўлиб ўтган саммитда қабул қилинган, унда Шимолий Африка мамлакатларидан Марокаш ва Тунис қатнашган.

Россия ҳарбий операцияси бошланганидан кейин Ғарб мамлакатлари Украинага қурол етказиб бериш ҳажмини оширди. Баъзи давлатлар Киевга совет даврига оид Т-72 танкларини берди. Хусусан, Польша баҳорда Украинага 230 дан ортиқ модернизация қилинган Т-72М1 танкларини юборди, Шимолий Македония эса июлда Киевга 2001 йилда унинг ўзидан сотиб олинган танкларни етказиб беришни бошлади. АҚШ ноябрда Украинага Чехияда сақланаётган 45 та Т-72 танкларини беришни ваъда қилди.