AQSH Ukrainaga Abrams tanklarini jo‘natsagina, Berlin ham Kiyevga Leopard tanklarini yetkazib berishga rozi bo‘ladi. Bu haqda Germaniya kansleri Olaf Shols AQSH prezidenti Jo Bayden bilan telefon suhbatida aytgan, deb xabar bermoqda Süddeutsche Zeitung nashri anonim manbalariga, The Wall Street Journal esa Germaniyaning yuqori martabali rasmiylariga tayanib.
Süddeutsche Zeitung nashrining yozishicha, Bayden kansler bilan suhbatda Abrams tanklarini yuborishni tasdiqlamagan.
Oq uy matbuot kotibi Karin Jan-Pyerdan Germaniyaning shartlari haqida izoh so‘ralganda, u Ukrainaga qurol yetkazib berish bo‘yicha qarorlar davlatlarning suveren qarorlari ekanini aytdi.
WSJ nashriga yevropalik yuqori martabali amaldorning aytishicha, Germaniya Leopard yetkazib berish bo‘yicha qarorini katta ehtimol bilan 20-yanvargacha qabul qilmaydi — o‘sha sanada Germaniyaning Rammshtayn bazasida Ukrainaga yordam ko‘rsatish bo‘yicha aloqa guruhining yig‘ilishi bo‘lib o‘tadi. NATOning bir qancha davlatlari diplomatlari aytishicha, uchrashuvning asosiy mavzularidan biri Kiyevga Leopard berish masalasi bo‘ladi.
Gazetaning ta’kidlashicha, Shols Ukrainani qurol, jumladan, tanklar bilan qo‘llab-quvvatlash bo‘yicha qaror qabul qilishda Germaniya do‘stlari va hamkorlari bilan “strategik jihatdan o‘zaro bog‘langan”ini aytgan.
Avvalroq The New York Times Germaniya boshqa mamlakatlar bitta bo‘lsa ham Abrams tankini jo‘natgan taqdirdagina, Ukrainani Leopard bilan ta’minlashi mumkinligini yozgandi. Xabarga ko‘ra, Berlin va Vashington bu borada faol muzokaralar olib bormoqda.
CNN va Politico ma’lumotlariga ko‘ra, 20-yanvar kuni Qo‘shma Shtatlar Ukrainaga eng katta yordam paketini e’lon qiladi, biroq uning tarkibidan Abrams tanklari joy olmaydi.
Izoh (0)