“Shvetsiya tarixidagi eng jiddiy josuslik mojarosi”. Rossiyaga josuslik qilgan shvetsiyalik aka-ukalar qamaldi

Stokgolm okrug sudi Shvetsiyaning ikki fuqarosini Rossiya foydasiga josuslik qilganlikda aybdor deb topdi. The Local buni zamonaviy Shvetsiya tarixidagi eng jiddiy josuslik mojarosi deb atamoqda.

Tergov ma’lumotlariga ko‘ra, aka-uka Peyman va Payam Kia o‘n yil davomida Rossiya maxsus xizmatlariga Shvetsiya milliy xavfsizligiga tahdid soladigan ma’lumotlarni uzatib kelgan. Sobiq Shvetsiya Davlat xavfsizlik xizmati va Shvetsiya Qurolli kuchlarida xizmat qilgan 42 yoshli Peyman Kia o‘zining rasmiy mavqeyi orqali maxfiy ma’lumotlarni qo‘lga kiritgan, 35 yoshli Payam Kia esa bu ma’lumotni Rossiya razvedkasiga bergan va buning uchun maosh olgan.

Bir yildan ortiq davom etgan sud jarayonidan so‘ng sud Peyman Kiani umrbodga, Payam Kiani esa to‘qqiz yil-u o‘n oyga ozodlikdan mahrum qildi.

“Rossiya Shvetsiya xavfsizligiga eng katta tahdiddir, shu uchun Rossiya foydasiga josuslik qilish harakatlari jiddiy baholanishi kerak”, — deya sud qaroridan iqtibos keltiradi The Local.

Aka-ukalarning o‘zlari ayblarini tan olmayapti, ularning advokatlari esa hukm ustidan shikoyat qilmoqchi.

Mavzuga doir:

• Shvetsiyada er-xotin Rossiyaga josuslik qilishda ayblanib, hibsga olindi
• Germaniya razvedkasi xodimi Rossiya foydasiga josuslikda gumonlanib, hibsga olindi
• Avstriyada diplomatning o‘g‘li Rossiyaga josuslik qilishda ayblanib qo‘lga olindi